Ақтауда Каспий саммиті аясында мерекелік концерт өтті

Кеше  Ақтауда көптен күткен халықаралық маңызды шара Бесінші Каспий саммиті өтіп, оған Қазақстан, Әзірбайжан, Иран, Ресей және Түрікменстан елдерінің басшылары арнайы келді. Саммитте Каспий теңізінің құқықтық мәртебесі туралы конвенцияға қол қойылды. Саммиттен соң ҚР Президенті Нұрсұлтан Назарбаев Әзербайжан Республикасының Президенті Ильхам Әлиевпен, Иран Ислам Республикасының Президенті Хасан Руханимен, Ресей Федерациясының Президенті Владимир Путинмен, Түрікменстан Президенті Гурбангулы Бердімұхамедовпен бірге Ақтау қаласының теңіз жағалауы арқылы өтетін жаңа нысанды – «Жартас жолын» аралап көрді. Мемлекет басшылары бірлесіп, қолдан өсірілген 500 ақсерке балығын теңізге жіберді.

Маңызды құжатқа қол қойылған күні Ақтауда қаласының тұрғындары мен қонақтары үшін Қазақстанның белгілі әншілері Айгүл Қосанова, Тамара Асардың қатысуымен мерекелік концерт өтті. Сонымен қатар теңіз жаңалауындағы дала сахнасында италиялық әйгілі Изобелла Биффи, Родольфо Гордини және «Сонремо» фестивалінің қатысушылары өнер көрсетті.

Кеш соңында алаңға жиналған жұртшылық үшін түнгі аспанды қызыл-жасыл әдемі түске бояп, мерекелік отшашу атылды. Аспанға атылған мерекелік отшашумен бірге әп сәтте жаздың жылы жаңбыры да құйып кетті. Дала сахнасының жанына жиналған халық толассыз жауған нөсерді елеместен көтеріңкі көңіл-күймен концертті тамашалады. Жаңбырдың жаууын шаһар тұрғындарымен бірге облыс басшысы да жақсылыққа балады.

«Бүгін Ақтауда бес мемлекеттің Президенттері Каспий теңізінің құқықтық мәртебесін белгілеп, тарихи құжатқа қол қойды. Еліміз, соның ішінде Маңғыстау өлкесі үшін халықаралық маңызды шараны абыроймен атқарды. Аспаннан жауған ақ нөсерді ырыс-береке, нұрға балауымыз керек», - деді Маңғыстау облысы Ералы Тоғжанов өзінің сөзінде.

Камшат ОҢҒАЛТАЙ,

Суреттерді түсірген Талант ҚҰСАЙЫН

[gallery td_select_gallery_slide="slide" ids="59451,59445,59446,59447,59448,59450,59452,59444,59453,59443"]