«ADILDIK JOLY» РҚБ филиалы Ақшұқыр ауылындағы Өнер мектебіне дайын ғимаратты сатып алу кезіндегі бұзушылықты анықтады, деп хабарлайды сайт mangystaumedia.kz сайты mangystautv.kz-ке сілтеме жасап.
Ғимаратты сатып алуға 145 миллион теңге жұмсалған. Мониторинг жүргізу кезінде еріктілер ғимараттың техникалық ерекшелік талаптарға сай келмейтінін анықтады. Техникалық талапта 32 кабинет болу керек екені көрсетілсе, сатып алынған ғимаратта 19 кабинет бар. Мектепте бес санитарлық тораптың біреуі де жоқ болып шыққан. Нысан оқу жылының басында ашылғанымен еріктілер техникалық, санитарлық-эпидемиологиялық және өрт қауіпсіздігіне күмән келтіріп отыр.
- Орталықтың жұмыс істеп бастағанына бір айдан асты. Онда 500-ге жуық бала қосымша білім алады. Мектепте өрт қауіпсіздігі қамтамасыз етілмеген. Бірде-бір өрт дабылы датчигі орнатылмаған, өрт сөндіргіштер жоқ. Біз еріктілермен бірлесіп, мектеп өкілдерінің қатысуымен мониторинг жүргіздік. Нәтижесінде, мемлекеттік сатып алу шартының талаптарында көрсетілген бірде-бір сәйкестік жоқ екеніне көз жеткіздік, - деп атап өтті «ADILDIK JOLY» РҚБ филиалының директоры Асқар Жақсыбаев.
Қоғамдық ұйымның мониторингі барысында анықталған фактілерді растауға сыбайлас жемқорлыққа қарсы іс-қимыл жөніндегі тиісті органдар араласуы мүмкін. Қазіргі уақытта аудиторлық тексеру тағайындалды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
