Бүгін Қарақия ауданы әкімдігінде германиялық "Hyrasia Energy" компаниясының өкілдері өңірде жүзеге асатын "жасыл" сутегі өндіру жобасын таныстырды, деп хабарлайды mangystaumedia.kz.
Еуропалық компания облыс аумағында теңіз суын тұщыту және сутегі өндіру ісіне ұзақ мерзімді инвестиция енгізуді ұсынып отыр. Қазіргі таңда компания күн және жел электр станцияларын салуға арналған қолайлы инвестициялық аймақтарды анықтау сатысында.
Жалпы жобаның құны — 50 млрд еуроны құрайды.
Жоба аясында 40 ГВт жаңартылатын энергия көздері яғни жел, күн энергиясының станциясын және су тұшыту мен индустриялық зауыттарын салуды көздейді.
- "Жасыл" сутегі өндіру жобасы өңірдің бірнеше аудан, қаласын қамтиды. Біз жобаны ең әуелі Қарақия ауданынан бастап отырмыз. Себебі, жобаның көп бөлігі осы ауданның аймағында орналасады, — деді Hyrasia Energy компаниясының инвестициялар бойынша директоры Айнұр Тұмышева.
Айтуларынша, жобаның жүзеге асу кезеңдері жоспарлау, жол, құрылыс жұмыстарын жүргізуге 5-7 жыл және жұмыс күші қажет.
Жоба жүзеге асқан соң 1800 тұрақты жұмыс орны ашылады.
Аталған жобаның арқасында Қазақстанның болашақта Еуроодақ елдері мен басқа да мемлекеттерге экологиялық таза тауарларды экспорттауға зор мүмкіндігі бар.
Инвестициялық тараптың презентациясынан кейін, аудан әкімі өз пікірін білдірді.
- Мұнай шаруалылығының болашағы алыс емес, қазірден-ақ жұмыссыздық мәселесі алаңдатып отыр. Оның үстіне өңірдің климаттық жағдайы күн және жел электр станцияларын салуға қолайлы. Бұл жоба жүзеге асып жатса, өңірді өркендетуге, жұмыссыздық деңгейін төмендетуге айтарлықтай оң әсері болады деп ойлаймын. Қоршаған ортаға, экологияға және ауыл шаруашылығына зиян тигізбеуі керек. Барлық әрекеттері заңды жүзеге асып жатса, әрине, қолдаймыз, - деді Қыдырберді Беков.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
