Мұнайлылық 3 оқушы республикалық пәндік олимпиадада топ жарды

Мұнайлы ауданының оқушылары пәндік олимпиаданың қорытынды кезеңінде топ жарып, жүлделі орындарды қанжығалады,-деп хабарлайды mangystaumedia.kz аудан әкімдігінің баспасөз қызметіне сілтеме жасап.

2023 жылдың 17-21 сәуір аралығында Ақтау қаласындағы «Балдәурен» базасында облыстың әр түкпірінен келген білімге құштар оқушылар қоғамдық-гуманитарлық бағыттағы пәндер бойынша сынға түскен болатын. Ұйымдастырушылардың айтуынша, биыл алғаш рет республикалық олимпиаданың гуманитарлық бағыты бойынша қортынды кезеңі өңірлерде өткен. Білім бәйгесінің басты мақсаты — оқушылардың ғылымға деген қызығушылығын дамыту, пәндік білімдерін тереңдету, дарынды балаларды анықтау, дамыту, қолдау.

Жарыс нәтижесі бойынша Ш. Мұңалұлы атындағы №5 жалпы білім беретін мектептің 11-сынып оқушысы Айдана Темірханова (Қазақстан тарихы пәні бойынша) жүлделі 1-орынды иеленді.

Білімпаз оқушы Айдана Темірханованың айтуынша, алдағы уақытта қазақстан тарихын тереңдете меңгеріп, ұстаз болуды армандайды. Сондықтан Қазақстанның үздік ЖОО-на түсіп, білімін шыңдамақ.

- Олимпиада өте тартысты өтті. Қазақстан тарихы бойынша Қазақстанның түкпір-түкпірінен 46 оқушы қатысты. 2-кезең болды, тест тапсырдық және эссе жаздық. Мен үшін сұрақтар қиын болды деп айта алмаймын. Себебі, 5-сыныптан бері қатысып келе жатырмын. Сондықтан да маған жүлде еңбек және мықты дайындықтың арқасында келді деп ойлаймын,-деді Айдана Темірханова.

Ал, №8 жалпы білім беретін мектептің 10-сынып оқушысы Ақнұр Эстурлиева (Қазақстан тарихы пәні бойынша) күміс жүлдені қанжығасына байлады.

№1 жалпы білім беретін мектептің 11-сынып оқушысы Карима Ізтұрған (қазақ мектептеріндегі орыс тілі пәні бойынша) 3-ші орынды иеленді.

Жалпы, гуманитарлық бағыт бойынша Маңғыстау облысының құрамасы 4 алтын, 4 күміс, 8 қола иеленген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.