Көктемнің жарқын мерекесі Ұлыстың Ұлы күні – Наурыз мейрамы. Жыл өткен сайын Наурыз мейрамы елімізді мекендеген бүкіл халықтың, ұлт пен ұлыстың сағынып күтетін ортақ мерекесіне айналып, жаңа мазмұнмен, жарасымды сән-салтанатымен түрлене түсуде. Наурыз мерекесі жадыраған жазды қарсы алар көктемнің басы болғандықтан, оны қазақтар «Самарқанның көк тасы жібіген күн» деп те атайды.
Бұл бүкіл табиғат ананың тоңы жібіп, жаны кіретін тіршілік басы дегенді білдіреді. Сондай-ақ бұл күні көңілінде кірбіңі барлар татуласады, адамдар бір-бірінің үйіне кіріп, құтты болсын айтады, бұлақ көзін ашады, алдын ала үйін, ауласын кір-қоқыстан тазартады.
Күн мен түн теңесіп, “Жаңа күн” жарқырап шығып, табиғат ана исініп, Жер ана бусанып, жұмыр жер бетіндегі тіршілік иелерінің бойына қан жүгіріп, ағаштар бүршік жаруға бейімделіп, тіріле бастағанда аталып өтетін “Ұлыстың ұлы күні” қай жағынан алып қарасаң да ұлық деуге болады. Қазақтың жаңа жылы саналған наурыз мейрамын аудан халқы асыға күтіп, жүздері жарқырап төс қағыстырады.
Биыл Қазақстан Республикасының Президенті Қасым-Жомарт Кемелұлының «Тәуелсіздік – бәрінен қымбат» мақаласында айтылған Наурыз мейрамын атап өту тұжырымдамасын әзірлеу және көктем мерекесінің мазмұнын байыту туралы тапсырмасына сәйкес, биылғы жылы Маңғыстау облысында Наурыз мерекесін атап өтудің бір айлық жоспары жасалып, тұжырымдамасы бекітілген болатын. Аудан көлемінде атаулы мерекелер қарсаңында түрлі деңгейде шаралар ұйымдастырылып, үлес қосуда.
Тұжырымдамаға сәйкес, аудандық мәдениет, дене шынықтыру және спорт бөлімінің ұйымдастыруымен аудандық кітапхана мен аудандық мәдениет үйі қызметкерлері облыстық "Батагөй ақсақалдар" байқауының бас жүлдегері, Маңғыстау ауданының Құрметті азаматы, шежіреші, бірнеше кітаптың авторы, ардагер Шаймұрза Байпақов ақсақалдың қатысуымен мерекелік шара өтті. Батагөй ақсақал батаның мәні және оның адам өміріндегі маңызына тоқталып, жаңа жыл тұсында халыққа ақ батасын берді.
Иә, наурыз мерекесі – қазақ халқының баға жетпес мәдени-рухани байлығының бейнесі іспеттес, сондай-ақ саяси тұрақтылықтың Қазақстан халқының бірлігі мен ынтымағының, достық қарым-қатынасының одан әрі нығаюына да зор үлесін қосады. Мейрам қарсаңында халық жылы шырай сезіне бастап, сағынышты көрісулерімен, жалынды құшақтасуларымен жаңа жылды қарсы алады. Ұлыстың Ұлы күні елімізді жақсылық, бақыт пен қуанышқа кенелтіп, гүлденуіне жол ашып, ауылдарға қуаныш сыйлайды.
З.ҚАЛИЕВА,
аудандық мәдениет, дене шынықтыру және спорт бөлімінің бас маманы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
