Биыл Маңғыстау облысында 7439 оқушы мектеп бітірді. Ал өңір бойынша Сарға ауылындағы Бейнеу мектеп-интернатында оқушы санына байланысты тек 2 түлек қана қияға қанат қақты, деп хабарлайды mangystaumedia.kz.
Маңғыстау облысы бойынша 31 мамыр күні барлық мектептерде бекітілген кестеге сәйкес сабақ өтіп, оқу күні сынып сағатымен аяқталды.
Ал өңір бойынша 7 мыңнан астам оқушы мектеппен қоштасып, болашаққа сеніммен қадам басқалы отыр.
Жалпы, аймақ бойыгша 14 500 оқущы 9-сыныпты бітірген. Ал 11 сынып бітірген оқушылар биыл алғаш рет соңғы қоңырауды 1 маусымда соқты. Балаларды қорғау күнімен сәйкес келген ерекше мезетте түлектер тарыдай болып кіріп, таудай болып шыққан білім ұясымен қимай қоштасты.
Маңғыстау бойынша ең көп мектеп түлегі Мұнайлы ауданында тіркелді. Атамекен ауылындағы №7 мектепті 117 түлек бітірді. Мұғалімдердің айтуынша, мұнда алты 11-сынып болған.
Ал Бейнеу ауданындағы Сарға ауылында ең ерекше оқиға орын алды. Мұндағы Бейнеу мектеп-интернатында соңғы қоңырау соғылып, 11-сыныпты тек екі қыз бала аяқтады. Негізінен, бұл ауылда екі мектеп бар. Оның бірі Ә.Жангелдин атындағы білім ордасы болса, екіншісі Бейнеу мектеп-интернаты. Алғашқысында 350-ден астам оқушы білім алады. Ал интернатта оқушылар саны тек 100-ден асады. Мектеп басшысының айтуынша, көбі жақын маңдағы ауылдар мен әлеуметтік аз қамтылған отбасының балалары.
"Биыл Сарға ауылындағы Бейнеу мектеп-интернатынан 2 түлек бітірді. Былтыр осы сыныпта көрші ауылдан екі ер бала келіп оқыған еді. Алайда 11-сыныпқа көшетін уақытта олар кетіп қалды. Себебі, дене тәрбиесі секілді сабақтар ер балалар үшін қызықсыз болды. Бейнеу мектеп-интернатында 104 оқушы бар. Оның 50-і интернатта жатады. Оқушыларға 29 мұғалім сабақ береді. Бізде 11 сыныпқа дейін оқушылар іріктеліп, тек екеуі ғана қалды. Көбі 9-сыныптан кейін колледжге түсті", - дейді мектеп директоры Айса Сағындықов.
Оның айтуынша, бір сыныпта екі оқушының ғана болуы өте қиын көрінеді. Мәселен, білім алуда бәсеке атаулы мүлдем болмайды екен.
"Оқушы аз болған жерде мүлдем өзара жарысып оқу деген болмайды. Егер сыныпта 15-20 оқушы болса, сабақ қызықты бола түсетіні сөзсіз. Ал екі оқушы болғаннан кейін оларды ынталандырып, қызықтыру мұғалімге оңай емес. Біздің биылғы түлектердің екеуі де қыз балалар. Алда өздері қалаған оқу орнына түсеміз деп отыр", - дейді мектеп басшысы.
Айта кететін бір жайт, биыл Маңғыстау облысында оқушыларға ақша жинап, мектепке немесе мұғалімдерге сыйлық жасауға тыйым салынған. Одан бөлек, шараға аниматорларды жалдап, шақыруға болмайтыны алдын ала ескертілген.
"Жалпы алдағы уақытта да балабақша мен мектептерде аниматорлармен шара өткізуге жол берілмейді. Сонымен қатар, мерекелік дастархан да жайылмайды. Түлектердің автокөлікті жалға алып, қала ішінде, табиғатқа экскурсия жасауға, қала сыртындағы сауықтыру орындарына баруына жол берілмейді, барлығы қатаң бақылауда болады. Мейрамхана, дәмхана және көңіл көтеру орындарында отырыс ұйымдастыруға рұқсат етілмейді, - дейді облыстық білім басқармасы басшысының орынбасары Айжақсы Тұржанова.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
