Өрттің алдын алу аса маңызды: Бейнеуде төтенше жағдай бойынша оқу-жаттығу жиыны өтті

Бейнеу ауданының аумағында Маңғыстау және Атырау облыстарының өңіраралық өзара іс-қимылын ескере отырып, дала өртін сөндіруді ұйымдастыру бойынша өрт-тактикалық оқу-жаттығулары өтті, деп хабарлайды mangystaumedia.kz әкімдіктің баспасөз қызметіне сілтеме жасап.

Аталған ауқымды өрт-тактикалық оқу-жаттығуларының мақсаты – жергілікті атқарушы билік және азаматтық қорғау саласындағы уәкілетті органдар арасында өзара іс-қимылды пысықтауға бағытталып отыр.

Жергілікті атқарушы органдар, төтенше жағдайлар бөлімі, өрт сөндіру бөлімдері лауазымды тұлғаларының дала өрттерін сөндіруді ұйымдастыру және басқару, жұмылдырылған күштер мен құралдарды басқару жөніндегі практикалық дағдыларын жетілдіруді көздейді.

Сондай-ақ мемлекеттік және мемлекеттік емес өртке қарсы қызметтің, аудандық ТЖ бөлімнің күштері мен құралдарының әзірлігін тексеру, табиғи өрттерді сөндіруге тартылған полиция, өрт сөндіру басшыларының және өрт сөндіру учаскелері басшыларының жауынгерлік іс-қимылдарының жағдайын бағалау, олардың шешуші бағытын айқындап табиғи өрттерді жоюға қатысатын бөлімшелермен радиобайланыс қызметін ұйымдастыруды пысықтау.

Оқу-жаттығуға Атырау және Маңғыстау облыстарының төтенше жағдайлар департаменттерінің күштері мен құралдары, «Сам» және «Бейнеу» орман шаруашылығының қызметкерлері, Бейнеу ауданы ауылдарының 9 ерікті құрамасы, «Nobilis Corp» ЖШС, «Хангелді-К» ЖШС, «Табынай» ЖШС, «Қазақтүрікмұнай» ЖШС, «Meerbusch» ЖШС «Қазақавтожол» ЖШС МЕӨҚҚ, НПП-47 Бейнеу өрт сөндіру пойызы, «Бейнеусусервис» МКҚК, «Бейнеуэнергосервис» МКҚК, Бейнеу аудандық полиция бөлімінің және Бейнеу аудандық ауруханасының қызметкерлері қатысты.

Оқу-жаттығу барысында 208 адам, 45 бірлік өрт сөндіру және қосалқы техника, 17 аспалы өрт сөндіргіш жұмылдырылған.

Қорытындылау кезінде Бейнеу ауданының әкімі Бейнеубек Әбілов оқу-жаттығу шарасы жоғары деңгейде өткенін және екі облыс бөлімшелерінің ұйымшылдығы мен үйлесімділігін атады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.