Есет ауылында жаңа мектеп салынады

Нұрлан Ноғаев Бейнеу ауданына іссапары аясында Есет ауылында барды. Өңір басшысы орта мектептің жай-күйімен танысып, ауыл тұрғындарының талап-тілегіне құлақ түрді, деп хабарлайды mangystaumedia.kz

Ауыл халқын алаңдататын аса өзекті мәселе - жаңа мектеп салу.

– Мемлекет басшысы Қасым-Жомарт Тоқаевтың тапсырмасы аясында елімізде «Жайлы мектеп» ұлттық жобасы жүзеге асып жатыр. Осы жоба аясында Есет ауылы тұрғындарының тілегі ескеріліп, ауданның кешенді даму жоспарына заман талабына сай жаңа, кең мектеп салу енгізілді, - деді Нұрлан Ноғаев.

Сондай-ақ Нұрлан Ноғаев Бейнеу ауылындағы су тазарту қондырғысының жұмысымен танысты. Су тазарту қондырғысы 2017 жылы іске қосылды. Станция тәулігіне 12 мың текше метр ауыз су өңдейді. Цистерналардың сыйымдылығы - 45 мың текше метр. Кәсіпорында 162 адам жұмыс істейді.

Аймақ басшысы жарты мыңнан астам адам кәсіби білім алып жатқан Бейнеу политехникалық колледжінде де болды. Кешен 5 ғимараттан тұрады. Колледж практикалық сабақтарға арналған заманауи жабдықтармен, смарт-сыныптармен, интерактивті тақталармен жабдықталған. Робототехника, техникалық модельдеу, технология және бейнелеу кабинеттері бар.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.