Маңғыстау облысы әкімі Нұрлан Ноғаев Бейнеу ауданына іссапары аясында Боранқұл ауылына арнайы барды. Ауылдағы әлеуметтік нысандардың жұмысымен танысып, тұрғындармен кездесті, деп хабарлайды mangystaumedia.kz
Облыс әкімі алдымен Боранқұл ауылындағы 610 бала оқитын орта мектепке бас сұқты. Мектепте 96 мұғалім жұмыс істейді. Ауылда барлығы 1 814 оқушы білім алады. 270-тен астам мұғалім қызмет етеді.
Бүгінде Боранқұл ауылының халық саны 7800-ге жуық адам. 240 орындық ауылдық клуб бар. Кітапхананың қоры - 17 600 кітап. Ауылда 49 шаруа қожалығы бар, оның 3-еуі - жылыжай кешені, ал қалғандары мал шаруашылығымен айналысады.
Аймақ басшысының ауыл тұрғындарымен кездесуі еркін форматта өтті. Ауыл халқы жұмыспен қамту, жол салу, ойын алаңдары мен саябақ салу, көшелерді жарықтандыру, медициналық мекемелерді кадрлармен қамтамасыз ету, ұялы және интернет байланысының сапасы, күл-қоқысты жою және кәдеге жарату сынды өзекті мәселелерді талқыға салды.
Облыс әкімі ауылдарды дамыту жоспарының және мемлекеттік бағдарламалардың уақытылы орындалуына бақылау жүргізуді тілге тиек етті. Сонымен қатар «Халық үніне құлақ асатын Үкімет» қағидасына сәйкес, азаматтардың өтініштеріне жедел жауап беретін «Маңғыстау облысының әкімдігі» арнайы телеграмм чаты іске қосылғанын атап өтті (https://t.me /mangystauakimat). Мұнда ең шалғай орналасқан елді мекендердің тұрғындары өз сауалдары мен өтініштері мен арыз-шағымдарын жолдай алады.
– Чатқа келіп түсетін сұрақтарды жеке өзім, менің орынбасарларым, барлық басқарма мен бөлім басшылары қадағалап, талдап отырады. Әрбір мемлекеттік орган өз бағыты бойынша жауап береді. Бүгінгі таңда чатта 14 мыңға жуық адам бар, – деді Нұрлан Ноғаев.
Жұмыс сапары барысында аймақ басшысы Боранқұл ауылындағы спорт нысанының құрылыс жұмысын сынға алды. Спорт нысанының құрылысы былтыр аяқталуы тиіс болатын. Алайда қазіргі таңда жалпы жұмыстың 30 пайызы ғана орындалған.
Өңір басшысы жауапты тұлғалардың келісім бойынша өз міндеттемелерін уақытылы орындамауына қатысты салғырттығын сынға алып, әлеуметтік нысан құрылысын жуық арада аяқтап, халық қолданысына беруді тапсырды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
