Сарға ауылының әкімі тұрғындар алдында есеп берді

Сарға ауылының әкімі Болысов Марат Есенұлы ауылда 2019 жылы атқарылған жұмыстар жөнінде есеп берді, - деп хабарлайды mangystaumedia.kz сайты Бейнеу ауданының әкімдігіне сілтеме жасап.

Есеп беру жиынына Маңғыстау облысының мемлекеттік сатып алу басқармасының бас маманы Татиманов Рауан Батырұлы, Бейнеу ауданының әкімі Әбілов Бейнеубек Көңілімқосұлы, аудан әкімінің орынбасарлары мен аппарат басшысы, мекеме, кәсіпорын басшылары және ауыл тұрғындары қатысты.

«Сарға ауылында халық саны 1705 адамды құрап, оның ішінде 942 ер адам, 763 әйел адам. Әр түрлі кәсіпкерлік саласында 60 адам еңбек етеді. Ауылда кіші кәсіпкерліктің 27 субьектісі бар. Жастардың кәсіпкерлік белсенділігі жылдан–жылға артып келеді. «Bastau Бизнес» жобасы бойынша 2019 жылы 4 адам оқып, екі адам жалпы сомасы 8,4 млн теңге алып кәсіптерін бастады. Бұндай жұмыстар өз кезегінде қоғамдағы жұмыссыздықты жойып жұмыспен қамтамасыз ету мәселесін шешуге әсер етеді. «Жас кәсіпкер» жобасы бойынша 3 адам 505 000 теңгеден қайтарымсыз грантқа ие болды. Ауыл жастары «Jas Project» жастар корпусын дамыту жобасына қатысып «Ақылды кітапшалар» жобасы 940​ 000 тг. (фетр матасынан балаларды дамытушы кітапшалар жасау). Экструдерленген жем қоспасын дайындау жобасы​ 924​ 500 тг. «Мейірім»​ жобасы 996​ 100 тг.​ (сиыр алып сүт өндіру) грант ұтып алды. Осы арқылы ауылдағы мүмкіндігі шектеулі отбасыларға көмек көрсетіп келді. Ауылда 12 шаруа қожалығы тіркелген. ​ Қазір тұрғындардың, шаруашылықтардың​ жеке иелігінде 12286 қой-ешкі, 918​ мүйізді ірі қара, 622 ​ жылқы, 916 түйе малдары бар. Жайылымдар ауыл шаруашылығын цифрландыру базасына енгізілді. Ауылда жалпы білім беретін 2 мектеп бар. Жанкелдин атындағы орта мектебінде 56 мұғалім қызмет етіп, 356 оқушы оқиды. ​ Бейнеу мектеп – интернатында 142​ бала оқып жатыр. Білім алушыларға 32 мұғалім, 12 тәрбиеші қызмет етеді. ​ Ауыл ішілік 2965 метр жолды жөндеуге жобалық-сметалық құжаттарын жасақтауға ұсыныс берілді. Биыл балалар ойын алаңы салынады. Көшені жарықтандыру жұмыстары жүргізіледі. Санитарлық тазалық жұмыстары жыл бойы жасалынатын болады. Демеушілік көмекпен ауылдағы мешіт күрделі жөндеуден өткізілетін болады» - деді Марат Есенұлы.

Сонымен қатар ауданда 2019 жылы атқарылған жұмыстар бойынша есепті аудан басшысы Бейнеубек Көңілімқосұлы баяндап, ауыл тұрғындары тарапынан қойылған ұсыныстар мен сұрақтарға жауап берді. Өз кезегінде ауыл ақсақалдары атқарылған жұмыстарға оң бағасын беріп, ризашылығын білдірді.

Маңғыстау Медиа

Редакциялық пікір мақала авторлары мен оқырмандардың пікірлерімен сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты / Мнение редакции может не совпадать с мнением авторов статей и читателей. Ответственность за достоверность изложенной в статьях и комментариях информации несут авторы.