Елімізде 1 наурыз - Алғыс айту күні жалпыхалықтық мереке ретінде биыл алтыншы рет атап өтілді. Ауданда көпшілікті береке-бірлікке, ынтымаққа бастайтын мереке мерейін көтеру мақсатында түрлі ізгі шаралар ұйымдастырылды.
Алғыс айту күніне орай «Мың алғыс» ақциясы аясында қолға алынып, ай бойы жүргізілетін ізгі шаралар басталды. Аудан әкімі Бейнеубек Әбілов бастаған топ ауылішілік тазалықты сақтауда жұмыла еңбек етіп жүрген жұмысшылармен кездесті. Аудан басшысы Бейнеубек Көңілімқосұлы тазалық сақтауда еселі еңбек етіп жүрген жұмысшыларды Алғыс айту күнімен құттықтап, жылы лебізін білдірді. Кездесу кезінде жұмысшылар өздеріне арналған дастарханнан дәм татып көңілді ән тыңдап, бір серпіліп қалды.
Осы күні аудандық кітапханада «Алғыс алғанның бағы жанар» атты кездесу шарасы ұйымдастырылды. Аталған шара кезінде алғыс айту халқымыздың асыл қасиеті екендігі, осындай ізгі істер береке-бірлікті нығайтып, баянды болашаққа бастайтыны баса айтылды. Сонымен қатар «Абыл» мәдениет үйінде «Бейнеу психологиялық-педагогикалық түзету кабинетінде» тәрбиеленіп, білім алып жүрген ерекше балаларға арнап мәдени шара ұйымдастырылды. Шара кезінде ерекше балалар «Аң патшасы - арыстан» атты мультқойылымды қызығушылықпен тамашалап, ерекше әсерге бөленді. «Жайдарлы» үкіметтік емес ұйымының ұйымдастыруымен Ж.Қалдығараев атындағы жалпы білім беретін мектепте «Аналарға мың алғыс» атты кездесу шарасы қатысқан аналарға ерекше көңіл-күй сыйлады.
Алғыс айту күніне орай ауданның өзге де еңбек ұжымдары мен оқу орындарында осындай тағылымы мол ізгі шаралар ұйымдастырылды.
Майра САРТАЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
