Бейнеуде ауылды көркейтуге бағытталған жобаға өтінім қабылдау басталды

Орталық Азияның Еуразия қоры және Қазақстан Теңізшевройл компаниясының қолдауымен жүзеге асатын "Қоғамдық кеңістіктер" жобасы Боранқұл ауылында басталды. Бұл туралы mangystaumedia.kz сайты Бейнеу ауданы әкімдігінің баспасөз қызметіне сілтеме жасап хабарлайды.

Жобаның мақсаты - өз ауылын көркейтуді қалайтын белсенді азаматтарға қолдау көрсету. Жобаға қатысу үшін ауылдың дамуына үлес қосуға ниет білдірген бастамашыл топ шағын жобаларды дайындайды. Мәселен инфрақұрылымды жетілдіру, абаттандыру, саябақ салу секілді тұрғындардың өмір сүру сапасын жақсартуға бағытталған жұмыстарды ұйымдастырушыларға ұсынады.

Осы жоба басталған күннен бері семинар-тренингтер өткізіліп жатыр. Тренинг барысында байқауға қатысатын шағын жобалардың тақырыптары анықталып, грант алуға өтініш білдіргендердің жұмыстары қаралды. Жобаның бюджеті 300 мың теңгеден 2,5 миллион теңгеге дейінгі аралықта. Егер жоба ауқымы кеңейіп, ауылды түгел қамтуға бағытталса 3 миллион теңгеге дейін көбейтуге мүмкіндік мол.

Байқауға Бейнеу ауданына қарасты Боранқұл ауылының тұрғындары қатыса алады. Өтінімдерді қабылдау 10 сәуірге дейін жалғасады.

Былтыр жоба аясында Боранқұл ауылында 5 жоба жүзеге асты. Олар Боранқұл санаторлық бөбекжайындағы ашық алаң, орта мектебіндегі арнайы логопед кабинеті. Бұдан бөлек, орта мектеп ауласын көгалдандыру жұмысы жүргізіліп, ойын алаңдары пайдалануға берілді.