Екпе кімдерге салынады?

Коронавирус инфекциясының алдын алу­дың тиімді жолы – вакцинациялау. Вак­ци­на­циялау вакцинаның түсуіне байланыс­ты кезең-кезеңімен жүзеге асырылады.

Бірінші кезеңде жұқпалы аурулар ауруханаларының, жедел медициналық көмек, жансақтау, алғашқы медициналық са­­ни­­тарлық көмек, қабылдау бөлімдерінің медицина қыз­мет­­керлері, санитарлық-эпидемиологиялық қызмет қыз­мет­керлеріне екпе салынады. Екінші кезеңде екпе жалпы бі­лім беретін мектептердің, жоғары оқу орындарының педагогтерін, бірінші кезеңге кірмеген медицина қызметкерлерін қамтиды. Үшінші кезеңде – мектеп-интернаттардың, мектепке дейінгі балалар мекемелерінің педагогтерін, студенттер мен созылмалы аурулары бар адамдарды, медициналық-әлеуметтік мекемелердің қызметкерлерін қамтиды. Бұдан басқа, кейіннен халықтың осал топтарын қоса отырып, контингентті кеңейту жоспарлануда.

«Профилактикалық егулерді жүргізуге медициналық қарсы көрсетілімдер тізбесін бекіту туралы» Қазақстан Республикасы Денсаулық сақтау министрінің 2020 жылғы 21 қазандағы №146 бұйрығына сәйкес КВИ-ға қарсы екпені тұрақты және уа­қытша медициналық қарсы көрсетілімдері бар адамдар алмайды, профилактикалық егуге қарсы көрсетілімдері жоқ­тар жіберіледі. Екпе жүргізер алдында дене температурасын өлшеу, эпидемиологиялық анамнезді жинау, сатурацияны, жүрек жиырылуының жиілігін, артериялық қысымды өл­шеу, тыныс алу және жүрек-қантамыр жүйесін аускультация­лау және жұтқыншақты тексеру секілді дәрігердің мін­детті тексеруі жүргізіледі. Егілетін адам егуді жүргізу алдында 2018 жылғы 13 маусымдағы № 361 санитарлық қағи­да­ла­рының 1-қосымшасына сәйкес жазбаша түрде ерікті ақпа­рат­тан­дырылған келісімге немесе профилактикалық егуді жүргізуден бас тартуға қол қояды.

КВИ-ға қарсы екпе Ресейде шығарылған Гам-КОВИД-Вак ("Спутник V") вакцинасымен басталып, Қарағанды фар­ма­цевтикалық кешенінің базасында өндірілген Гам-КОВИД-Вак вакцинасымен жалғасады. Вакцинациялауды I компонентпен 0,5 мл. дозада, содан кейін 3 аптадан кейін II компонентпен 0,5 мл. дозада екі кезеңде жүргізеді. Егуден кейін міндетті түрде екпе алған адам алғашқы 30 минут ішінде және иммундаудан кейінгі келесі 3 күн ішінде дәрігердің бақылауында болады.

Иммундауды дайындау және жүргізу жөніндегі іс-шараларды жедел жоспарлау және үйлестіру үшін аудандық штаб құрылды. Ауданымызда коронавирустық инфекцияға қарсы екпе жүргізетін медицина қызметкерлеріне аудандық семинар және аттестация­лау ұйымдастырылып, нәтижесінде 37 медицина қызметкері аттестациядан өткізіліп, екпе жүргізуге рұқсат алды. Вакцинация­лау жүргізілетін егу кабинеттері және дәрі сақтау қоймасында санитарлық талаптарының сақталуына Бейнеу аудандық санитарлық-эпидемиологиялық бақылау басқармасы бөлімінің қызметкерлері тарапынан мониторинг жүргізіліп, ұсыныстар берілді.

Н.Қауынбаева,
Бейнеу аудандық санитарлық-эпидемиологиялық бақылау басқармасының бөлім басшысы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.