«Маңғыстау жұлдыздары» - Түпқарағанда

2006 жылдан бері өңірімізде өткізіліп келе жатқан «Маңғыстау жұлдыздары» байқауында жыл сайын жаңа дарын танылады, бұрынғы өнерпаздардың өнері бағаланып келеді. Дәстүрін жоғалтпаған өнер бәйгесі осы жылы «Жетістікке жетелейтін жеті қыр» деген тақырыпта өтті. Сайыстың қызығы да осында – жыл сайын жаңа тақырып концерттік бағдарламаның мазмұнын ашпақ. Биылғы тақырып – Тұңғыш Президент Н.Назарбаевтың тарихымызды білуге, өткенді өнеге етіп, болашаққа нық сенімді халық ретінде қадам жасауға шақыратын «Болашаққа бағдар: Рухани жаңғыру», «Ұлы даланың жеті қыры» бағдарламалық мақалаларын негізге ала, биылғы «Жастар» жылы, Сүгір жырау Бегендікұлының 125 жылдығы, күйші-сазгер Мұрат Өскінбайұлының 115 жылдығы, халық жазушылары – Әбіш Кекілбайұлы мен Фариза Оңғарсынованың 80 жылдық мерейтойлары аясында өткізілді. Көрерменіне көңілді көңіл-күй сыйлай білген Түпқараған ауданы өнерпаздары бар өнерін әділқазылар мен көрермендер алдында ықыласпен көрсетті. Әннен шашу шашып, би билеп, күй орындап, сахналық көріністер мен Әбіш пен Фариза шығармаларынан үзінді айтып, сайыстың шартына сәйкес барлық жанрды қамтыды. Бұл шараға «Арынғазының күйін» қобыз аспабымен көрерменге жеткізген Ұлдай Ускен, «Ля моль» вокал тобы, аудандық хор ұжымы, саз сырнайда өнер көрсеткен Қарлығаш Озғанбаева, жеке ән орындауда Бердібек Сәрсенбай, баян аспабында өнер көрсеткен Алтынгүл Әділханова, биші Аида Төлеуова, «Қызғалдақтар» үлгілі би ансамблі, «Толқын» вокалды аспаптық ансамблі, домбырашылар ансамблі, «Өрен» ұлт аспаптар ансамблдері, барлығы 150-дей өнерпаз қатысты. - Концерт басынан аяғына дейін өте жақсы жинақылықпен өтті. Көрермен ретінде аудан өнерпаздарына жақсы бағдарламаны ұсынғаны үшін алғысымды айтамын. Бас жүлдеге ие болып жатса, қуаныштымын, - дейді концерттің көрермені болған Түпқараған ауданының тұрғыны Гүлсім Қарымсақова.