Бейнеуде мұражай мен мектеп бірлесе танымдық шара өткізді
[ 2019 ] 20 наурыз, 07:43 | Аудан тынысы
Бейнеу ауданында Наурыз мейрамы қарсаңында көптеген мәдени-танымдық іс-шара ұйымдастырылды. Солардың қатарында Бейнеу мұражайының ұжымы мен Ж.Қалдығараев атындағы орта мектебінің бастауыш сынып жетекшісі Орынай Оразбаеваның бірігіп ұйымдастыруымен «Жыл басы - Наурыз» атты мерекелік шара өтті.
Халқымыздың ұлы мерекесі Наурыз мейрамының мән-мағынасын түсіндірумен қатар, өз елінің салт-дәстүрін құрметтей білуге тәрбиелеу мақсат тұтқан шараға оқушылардың ата-аналары да белсене қатысып, ұл-қыздарының қуанышына ортақтасты.
Мерекелік шара барысында ата-аналардың бірі Зияда Күзекбаева көпшілікке қазақ халқының танымы мол салт-дәстүрінің бірі - сәбиді бесікке салу рәсімін көрсетсе, оқушылар біріге бесік жырын айтты.
Өнерлі де дарынды мектеп оқушылары ұлттық «Қара жорғаны» биін билеп, Наурыз туралы тақпақтар айтып, ән шырқап, көрініс көрсетті. Сондай-ақ олар мұражай ғимаратында мерекеге орай әзірленген көрмені тамашалап, тарихи мұралармен танысты.
Үміт ҚАЗДАЕВА
1717
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
