Мамандар көбейіп, жұмыс қарқыны артуда

Өткен жеті айда «Вагонсер­вис» АҚ Маңғыстау телімінде жағымды өзгерістер болды. Ме­кемеге қажет қызмет түрлері бойынша жаңа жұмыс орында­ры ашылып, жұмыс күші арт­ты. Бұрын жетіспейтін элект­рик, аккумуляторшы, салқындатқыш құрылғыларын жөндеуші слесарь, пойыз элект­ромеханигі мамандарына 13 штат бөлінді.

– Бүгінде Маңғыстау станциясында «Вагонсервис» жұмысшылары 157 адамға жетті. Бейнеуде 25 адам бар. Былтырғы желтоқсан айынан бері жұмысшыларымыз төрт мезгілмен жұмыс істейдіі, бұрын екі ауысым еді. Қазір түнгі кезек те ашылды. Себебі «Маңғыстау – Ақтөбе» пойызы түнде келіп, таңертең кетеді. Сондықтан түнгі уақытта да жұмыстануға тиіспіз. Бүгінде бәрімізге белгілі – вагондар көп, қатынас қарқынды. Сондықтан бұған дейін вагондарды жолға жүруге дайындау, жөндеу үшін кейбір мамандар керек бола­тын. Сұраныс берген едік, шілде айында қажетіміз қанағаттандырылып, 13 адамды жұмысқа қабылдадық. Оның ішінде 2017 жылы оқу бітіріп, жұмыссыз жүрген жастар да бар. Жұмыс ауысымы өзгергендіктен тағы бір шеберді жұмысқа алдық. Тамыз айына дейін осы аталған орындар­да біраз вагон жөнделіп шықты. Яғни, ТО-1-де - 7228, ТО-2-де - 80, ТО-3-те - 122 вагонға қызмет көрсетілді. ТО-2-де енді қыркүйек-қазанда қысқы дайындық жөндеуі бола­ды. Оған жүздің үстінде вагонды жоспар­лап отырмыз, – дейді «Вагон­сервис» АҚ Маңғыстау телімінің басшысы Нұркен Қайыров.

Сонымен қатар бұл мекемеде осы жарты жылдықта болған айтуға тұрарлық тағы бір жаңалық – «Вагонсервис» АҚ Маңғыстау телімі теміржолшыларының қолмен атқаратын кейбір шаруаларының жеңілдегені. Өткен айдың соңында 4 тонналық аша тиегіш (вылочный погрузчик) техникасы сатып алынған. Нәтижесінде жұмысшылар бұрынғыдай вагон генера­торын тексеру үшін электродвигательді қолмен көтеріп, арбаға салып, оны өздері тасып әуреге түспейді. Бар жұмысты ма­шина атқарады.

Шахида ЖҰМАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.