Түпқараған жастарына «Жас сұңқар-2017» сыйлығы табысталды

Табиғатпен үндесе өмір кешетін құстар әле­мі өзінше әдемі, ғажайып әлем. Олардың табиғатта ән салғаны, неше түрлі қылып, үн шығарғаны тек қана жадыраңқы көңіл-­күй сый­лары анық. Соның ішінде өз жастарымызды жас сұңқарға теңегеніміз – әрдайым мақсат­тары биікте болсын, сұңқар тәрізді мықты болсын деген тілегіміз. Себебі сұңқарлар ең биікке ұя салатын, құстар сұңқар тәрізді құстар өте мықты болып келетін топ.

Түпқараған ауданында дәстүрлі түрде өтетін «Жас сұңқар» сыйлығын табыстау салтанаты жастардың асыға күтетін мейрамды күніне айналғалы 7 жыл болыпты. Аудан әкімінің қолдауымен, аудандық жастар ресурстық орталығының ұйымдастыруымен өтетін шарада белсенді жастар легі марапаттан құр қалған емес. Осы жолы да 10-нан аса жас өз істерінің маманы ретінде ескерілді, қоғамға тигізген пайдасы еленді. Сыйлықты табыстаған аудан әкімінің орынбасары Қайнарбаев Жансейіт Исаханұлы жастарды марапатымен құттықтап, толағай жетістіктерге жете беруіне тілектестігін білдірді. Биылғы жылы «Үздік жас мемлекеттік қызметкер» номинациясын аудандық ішкі саясат және тілдерді дамыту бөлімінің бас маманы Салиянқызы Сымбат иеленді. Ол - Қазақстан Республикасы Тәуелсіздігінің 25 жылдығына орай облыс әкімі орынбасарының алғыс хатының иегері, тұңғыш Президент мерекесіне орай аудан әкімінің алғысын иеленген ауданның қоғамдық-саяси өміріне белсене атсалысып жүрген жас маман. «Үздік жас мұғалім» номинациясымен марапатталған Ақшұқыр мектеп-лицейінің ағылшын тілі пәнінің мұғалімі Ғимран Мүсіров – аудандық «Тілші мұғалімдер-2016» олимпиадасының бас жүлде, аталмыш байқаудың облыстық кезеңінің 3-орын иегері, «Туған топырақтың тума таланттары» облыстық байқауының жеңімпазы, республикалық басылымдарда сабақтары жарияланып жүрген белсенді жас маман. «Үздік жас мамандар кеңесінің жетекшісі» номинациясымен Ғ.Айдаров атындағы№1 жалпы орта білім беретін мектеп-лицейінің қазақ тілі және әдебиеті пәнінің мұғалімі Қалменова Гүлмира Алдоңғарқызы марапатталды. Гүлмира Алдоңғарқызы – мектепішілік «Үздік сынып жетекші-2017» сайысының 1-орын, аталмыш байқаудың аудандық кезеңінде 3-орын, облыстық жастар ресурстық орталығының алғыс хаты, «Ұстаздар» республикалық танымдық порталының алғыс хаты иегері, Сайын  ауылының  жас  мамандар  кеңесінің жетекшісі.

«Үздік жас кәсіпкер» номинациясымен Тәуелсіздіктің 25 жылдық мерекесіне орай алғысының иегері, өз кәсібін нәсіп етіп, қайырымдылық жасауда өз ортасына үлгі, тұрғындардың сұранысына орай қолжетімді деңгейде адал қызмет көрсетіп жүрген жас кәсіпкер Жаңғараев Тарас Аманқосұлы марапатталды. Одан кейінгі кезекте өз мамандығы бойынша тәжірибелі мамандардың бірнеше шеберлік сыныбынан өтіп, Қызылөзен ауылында домбыра үйірмесінің жетекшісі, ауданның қоғамдық-саяси өміріне белсене қатысушы өнерлі жас, аудандық ұлт-аспаптар оркестірінің белді мүшесі, түрлі өнер сайыстарының жеңімпазы Түгелбаева Әсем Омарқызы «Үздік жас өнерпаз» номинациясымен алды. «Үздік жас спортшы» номинациясымен Ақшұқыр мектеп-лицейінің дене тәрбиесі пәнінің мұғалімі Таңбай Жамбыл Ықыласұлы ма- рапатталды. Жамбыл Ықыласұлы – түрлі республикалық, халықаралық деңгейдегі жарыстардың жеңімпазы, 2016 жылы кикбоксингтен әлем кубогінің 1-орын, аталмыш федерациясының Президентінің алғыс хатының иегері, 2017 жылы кик-боксингтен Қазақстан Республикасының спорт шебері атанды. «Үздік жас жорықшы» номинациясымен М.Горький мектеп-лицейінің 10-сынып оқушысы Қосайұлы Бекжан марапатталды. Ол – аудандық, облыстық ғылыми-жоба байқауының 1-орын, «Менің отаным – Қазақстан» туристік-өлкетану экспедициялық жасақтарының аудандық, облыстық, республикалық байқауының 1-орын иегері, 2016-2017 оқу жылында «Айбын» әскери-патриоттық республикалық сайысының жеңімпазы, оқу озаты болып танылып жүр. «Үздік жас робототехник» номинациясымен Форт-Шевченко мектеп-интернатының 9-сынып оқушысы Юсупов Еркін Ерболұлы марапатталды. Еркін Ерболұлы - қазіргі таңда жастар арасында сұранысқа ие, заман талабына сай оқушылар арасында робот құрастыру өнерін меңгеруде жетістіктерге жетіп жүрген, мектептегі робототехника үйірмесінің тұрақты мүшесі, республикалық ро- бототехниктер сайысының қола медаль иегері. Ал Шахта орта мектебінің 11-сынып оқушысы Жолымберген Бәйдібек Орынбекұлы «Үздік жасақ мүшесі» номинациясымен марапатталды. Себебі ол – «Жасыл ел» бағдарламасы бойынша ауылдың гүлденуі мен көркеюіне белсенді үлес қосып, облыстық «Үлгілі ауыл-2017» конкурсында 1-орын иеленген, Таушық ауылының тазалығы мен көркеюінде өзіндік қолтаңбасын қалдырған белсенді жас. «Үздік жас отбасы» номинациясымен Баутин ауылының тұрғындары - Рамазановтар отбасы марапатталды. Бұл отбасы еліміздің демографиясын көтеруде өзіндік үлес қосып, бала тәрбиесінде жас ата-ана ретінде балабақша өміріне атса- лысты. Түрлі деңгейдегі отбасылық шараларда, қайырымдылық шараларда белсенділік танытып жүрген, өзге жас отбасыларға үлгі боларлықтай сыйластық пен береке орна- ған жас отбасы деп танылды.

«Бұл марапат жыл бойына жастардың еңбегін саралайды. Осы жолы марапатталған барлық жасты өте белсенділер деп толық айта аламын. Аудан әкімі жанынан құрылған арнайы әділқазылардың шешімінде тек мамандығы бойынша емес, аудандық жастар орталығымен байланысып, қоғамдағы жастар ісіне де араласқан жігерлі топ бүгін өз марапаттарын алды. Алдағы уақытта одан да биік белестерден көрінулеріне тілектеспін. Елбасының жастарға қолдау көрсету мақсатында еліміз бойынша жүзеге асырылып жатырған жобалары мен мемлекеттік бағдарламалары, жастар саясаты туралы заң – жастарымыздың жарқын, қамсыз болашағының кепілі. Аталмыш қолдаулар арқылы аяғынан тік тұрып, біліммен қаруланып, еңбекке араласып, жастық күш-жігерін аянбаудың дәлелі ретінде бірауыздан түпқарағандық жастардың үндеуін осы шарада тыңдадыңыздар. Жастардың осындай жалынды, жігерлі болғанына аса риза боламын» - деді аудандық ресурстық орталықтың жетекшісі Гүлшат Бөлтенова бізге берген сұхбатында.

Клара МЕҢДІБАЙҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.