Әлем зерттеушілері ВИЧ бойынша алға жылжығанымен, медицинаның қауқары әлі де дәрменсіз. ВИЧ – пневмония, қатерлі ісік, гепатит, туберкулез сынды ауруларды жеделдетеді. Жыл басынан бері облыс тұрғындарына ЖИТС-тің алдын алу бойынша 153 іс-шара жүргізілген. Кәмелеттік жасқа толмаған жасөспірімдер, тіпті 14-15 жастағы балалардан табылған жағдайлар да бар, деп хабарлайды mangystaumedia.kz
Ақтаудағы ЖИТС орталықтағы алдын алу бөлімінің меңгерушісі Алмагүл Кемазанованың айтуынша, АИТВ инфекциясы адамдардың өмір сүру ұзақтығы мен сапасына әсер ететін ауру. Адам бұл ауруды жұқтырғанда ғана шарасыздықпен бетпе-бет келеді. Бүкіл иммундық жүйе зақымдалады.
- АИТВ инфекциясының таралуы халықтың өмір сүру ұзақтығына елеулі теріс әсер етеді. Профилактикалық іс-шаралардың негізі – халықты кеңінен, уақытылы және қолжетімді ақпараттандыру және оқыту. Алайда, аурудың салдарымен күресу емес, алдын алу жеңілірек. Әсіресе халықтың негізгі топтары - жастар, яғни жоғары сынып оқушылары, жоғары оқу орындары мен арнайы оқу орындарының студенттері арасында АИТВ инфекциясының алдын алу бойынша жұмыс жүргізілуде. Жеке алдын алу шаралары: кездейсоқ жыныстық қатынастарды, есірткіні қолдану мен енгізуді болдырмау, татуировка жасатпау, ортақ ұстара, маникюр және басқа да жеке гигиена заттарын пайдаланбау, тек жеке қорғаныс құралдарын пайдалану. Салауатты өмір салтын ұстанып, теріс әрекеттерден аулақ жүрген абзал. Салауатты әдеттер денсаулықты сақтауға және нығайтуға ықпал етеді. Ойланбаған іс-әрекет теріс салдарға әкеліп соқтырады. Сіздің өміріңіз бен денсаулығыңыз өз қолыңызда. Әр адам өз денсаулығына жауапкершілікпен қарап, салауатты өмір салтын қалыптастыру үшін дұрыс таңдау жасай алады, әлі де кеш емес, - дейді ЖИТС орталығының маманы.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
