Маңғыстаудағы білім беру ұйымдарында санитарлық талаптар сақталмаған

Маңғыстау облыстық санитариялық-эпидемиологиялық бақылау департаменті басшысының орынбасары Асылбек Шаровтың мәлімдеуінше былтыр тиісті департамент өңірдегі білім беру және тәрбиелеу объектілеріне 279 тексеру жұмыстарын жүргізді, деп хабарлайды mangystaumedia.kz ҚКО-на сілтеме жасап.

Деректерге сүйенсек, 2022 жылы ерекше тәртіппен 184 нысанды тексеру жоспарланып, оның ішінде 166-ы тексерілген.

-166 объектінің 165-інде кемшіліктер анықталды. Нысандарда жүргізілген санитариялық-эпидемиологиялық тексеру нәтижелері бойынша анықталған кемшіліктерге сәйкес және лабораториялық зерттеу қорытындылары бойынша жауапты тұлғаларға барлығы 22 528 365 теңге айыппұл салынып, 79 әкімшілік шара қолданылды, - деді Асылбек Шаров.

Анықталған кемшіліктерді жою мақсатында 171 санитариялық ұйғарым беріліп, оның ішінде 122-сі талапты орындаған. Берілген санитарлық ұйғарымның орындалысы бойынша жүргізілген жоспардан тыс тексеру нәтижесінде жалпы білім беру мектептерінде санитариялық талаптардың орындалмауына байланысты Жаңаөзен қаласындағы 4 нысанның құжаты сотқа жолданған.

Нақтылар болсақ, тексеру барысында қатты тұрмыстық қалдықтарды жинауға арналған контейнер қақпақтарының болмауы, спорт алаңдары қажетті құрал-жабдықтармен толық қамтамасыз етілмеуі, мектеп ішіндегі дәретханаларда істен шыққан санитарлық құрылғылардың уақытылы ауыстырылмауы, өндірістік бақылаудың ұйымдастырылмауы, химия кабинеттерінің құрал-жабдықтарының толық жабдықталмауы, спорт залдарындағы киім ауыстыратын бөлмедегі жиһаздардың жеткіліксіздігі көп кездеседі.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.