24 қараша ҚР еңбек сіңірген әртісі, «Құрмет» орденінің иегері, күйші Роза Айдарбаеваның 70 жасына арналған шығармашылық кеші өтті, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.
Кеш байқау жеңімпаздарын марапаттаумен басталды. Екі күнге созылған өнер сайысына Астана, Алматы, Қарағанды, Қызылорда қалаларынан және Атырау, Маңғыстау облыстарынан барлығы 20 үміткер қатысты.
Әділқазылар шешімімен бас жүлде және лауреат атағын Маңғыстау өнер колледжінің ІІ курс студенті Бекзат Қалаубай алды.
Кеш соңында аймақ басшысы Нұрлан Ноғаев Роза Айдарбаеваны мерейлі жасымен құттықтап, оның қазақ өнеріне қосқан сүбелі үлесін атап өтті.
-Қазақ халқының рухани дүниесінде күй өнерінің алатын орны ерекше. Күй - ұрпақ арасындағы сабақтастықтың алтын арқауы. Сол алтын көпірді жалғастырушылардың бірі - Роза Айдарбаева. Маңғыстау күйлерін алғаш жүйелі түрде, кәсіби деңгейде нотаға түсіріп, талай шәкірт тәрбиелеп шығарды. Роза Тайманқызы, Сізді бүгінгі мерейтойыңызбен шын жүректен құттықтаймын. Әрдайым жұлдызыңыз жарқырай берсін! Өнеріңізді халық игілігіне бағыштап, ортамызда ұзақ ғұмыр кешіңіз. Сізге зор денсаулық, шығармашылық табыс тілеймін, - деді Нұрлан Ноғаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
