Маңғыстау облысында 2023 жылы медициналық сақтандыру жүйесіне қатысушылардың саны 676 982 адамды құрады. Бұл туралы Қоғамдық коммуникация орталығында өткен брифингте «Әлеуметтік медициналық сақтандыру қоры» КЕАҚ Маңғыстау облысы бойынша филиал директоры Елдеш Қосмағанбетов мәлімдеді, деп хабарлайды mangystaumedia.kz.
Спикердің сөзінше, Маңғыстау өңірі бойынша халықтың 62,5 пайызы немесе 485 849 адам - олар 15 жеңілдік санатында болса, 26,4 пайызы жалдамалы қызметкерлер.
«МӘМС жүйесіне қатыспаған 100 223 маңғыстаулық қалды. Сақтандырылмаған адамдардың 17 мыңы тұрақсыз төлеушілер. Яғни, олар үшін қандай да бір аударымдар мен жарналар алынған, бірақ олар тұрақты емес. Соның салдарынан МӘМС жүйесінде сақтандыру мәртебесі жоқ болады. Сондай-ақ, жылдан жылға медициналық сақтандыру қорымен халыққа медициналық қызмет көрсетуге шарт жасасқан өнім берушілер санының өсімі байқалады. Егер 2020 жылы қызмет жеткізушілер саны 46 медициналық ұйымды құраса, 2023 жылдың басында қызмет жеткізушілер саны 77-ге дейін өсті. Көрсеткішке сәйкес, қор медициналық қызмет жеткізушілері арасында жеке клиникалардың үлесі басым екені байқалады», - деді Елдеш Қосмағанбетов.
Сондай-ақ, спикер брифингте міндетті әлеуметтік медициналық сақтандыру жүйесін енгізудің арқасында облыстың ауыл тұрғындары үшін медициналық көмекті қаржыландыру ұлғайғанын айтты.
«МӘМС жүйесін енгізу нәтижесінде өңіріміздің ауыл тұрғындары үшін медициналық көмекті қаржыландыру ұлғайды. Соңғы жылдары ауыл медицинасын дамытуға басты назар аударылуда. Мысалы, 2020 жылы ауыл тұрғындарын стационарлық емдеуге 2 млрд теңгеден астам қаражат қарастырылса, оның 668,2 млн теңгесі МӘМС жүйесіне жұмсалды. Ал, 2022 жылдың қорытындысы нәтижесінде ТМККК және МӘМС бойынша облыстың ауылдық медициналық ұйымдары көрсеткен стационарлық пен стационарды алмастыратын жағдайларда көрсетілетін қызметтердің құны 3 млрд теңгені құрады. Осылайша, біз халық үшін міндетті әлеуметтік медициналық сақтандыру жүйесінің барлық артықшылықтарын көре аламыз», - деді Елдеш Қосмағанбетов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
