Маңғыстау студенттері үшін 1500 арнайы грант бөлінді

Биыл еліміздің жоғары оқу орындарының барлығына 73 мың грант береді. Мемлекет басшысының тапсырмасына сәйкес олардың 60%-ы инженерлік-техникалық мамандықтарға бөлінген. Бұл туралы ОКҚ-да өткен баспасөз мәслихатында ғылым және жоғары білім вице-министрі Қуаныш Ерғалиев мәлімдеді, деп хабарлайды mangystaumedia.kz

"Халық тығыз қоныстанған, батыс және жаңадан құрылған облыстардың жастары үшін арнайы гранттар бөлінді. Мысалы, Атырау, Маңғыстау облыстарына 1500 грант, Ұлытау облысына – 300, Жетісу облысына – 300, Абай облысына – 500, Шымкент қаласына – 400 және Түркістан облысына – 500 арнайы грант бөлініп отыр. Яғни, бұл гранттар педагогикалық, инженерлік, естествен мамандықтары мен жаратылыстану ғылымдарына бөлінген", - деді Қуаныш Ерғалиев.

Вице-министр бұл ретте түлектер өз бетінше шешім қабылдай алатынын және өз еркімен жалпы конкурсқа немесе арнайы грантқа қатыса алатынын атады.

Биыл педагогикалық квотаға 47% грант бөлінген. Сондай-ақ, өңірлік университеттер алғаш рет ауыл шаруашылығы және инженерлік бағыттарды қолдау үшін пилоттық режимде бөлінген арнайы гранттар алып отыр.

Жоғары оқу орындарына түсу үшін түлектердің өтініштерін қабылдау науқаны 13-20 шілде аралығында өтеді. Биыл түлектерге құжаттарды тапсырудың үш нұсқасы ұсынылады. Оның ішінде eGov.kz арқылы, университетке арнайы бару немесе виртуалды қабылдау комиссиясы арқылы таңдаған университетке өтініш бере аласыз.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.