Маңғыстау облысы мәслихатының алғашқы төрағасы Тергеу Айдарханов дүниеден озды

83 жасына қараған шағында мемлекеттік басқару және мұнай-газ кешені саласының ардагері, Маңғыстау облысы мәслихатының алғашқы төрағасы Тергеу Айдарханов дүниеден өтті, деп хабарлайды mangystaumedia.kz.

Тергеу Айдархановтың дүниеден озуына байланысты марқұмның отбасы мен туыстарына, Маңғыстау халқына облыс әкімінің аппараты, Маңғыстау облыстық мәслихаты, ардагерлер кеңесі және қоғамдық кеңес қайғыра көңіл білдіреді.

Тергеу Айдарханов 1941 жылы Маңғыстау облысы, Түпқараған ауданы, Таушық ауылында дүниеге келген.

1948-1958 жылдары Шахта орта мектебінде оқып, 1963 жылы тау кен инженер-геологы мамандығымен Қазақ Кенметаллургия - политехникалық институтын (қазіргі ҚазҰТУ) бітіріп, "Маңғышлақмұнайгазбарлау" тресінде мамандығы бойынша жұмыс атқарды.

1963-1973 жылдары аға геолог басқарушысы болып Қарамандыбас, Тасболат, Шығыс Жетібай, Ақтас кен орындарында және Жетібай мұнай барлау экспедициясында геологиялық техник, инженер және аға геолог ретінде "Маңғышлақ мұнайбарлау" тресінде жұмыс жасаған.

1971-1973 жылдары оңтүстік Маңғышлақ мұнай барлау экспедициясында бас геолог болып жұмыс жасады.

1973 жылы партия жұмысына шақырылып, 1978 жылы өндірістік көлік бөлімінің бастығы, партия комитетінің хатшысы, Ералиев ауданының партия комитетінің екінші хатшысы қызметін атқарды.

1978-1980 жылдары Қазақстан Компартиясы Маңғышлақ облыстық партия комитетінің ұйымдық-партиялық жұмыстар бөлімінің меңгерушісі болды.

1980-1983 жылдары Мұнайлы ауданы партия комитетінің бірінші хатшысы болған.

1989 жылы Ералиев ауданының партия комитетінің бірінші хатшысы болып жұмыс жасады.

1989-1994 жылдар аралығында "Тау-кен металлургия" комбинатында директордың орынбасары, "Каскор" акционерлік компаниясында вице-президент болып жұмыс атқарған.

1994-1999 жылдары Маңғыстау облыстық мәслихатының депутаты және хатшысы болып сайланады.

1999-2001 жылдар аралығында Маңғыстау облысында жылжымайтын мүлік орталығының директоры болып қызмет атқарса, 2001-2005 жылдар кезеңінде "Маңғыстаумұнайгаз" АҚ ЖШС-нің директорының кеңесшісі және персоналды басқару бөлімінің бас маман қызметін атқарды.

2005 жылдан бастап Қазақстан халқы Ассамблеясы мен Маңғыстау облысының әкімі жанындағы ардагерлер кеңесінің мүшесі, қазіргі уақытқа дейін "Тасболат Ойл Корпорейшн" ЖШС-да геология кеңесшісі болған.

Тергеу Айдарханов "Ерен еңбегі үшін" медалімен, кейін "Астана" медалімен марапатталды. Сонымен қатар, "Қазақстан мұнайына 100 жыл" медалімен, Маңғыстау облысы әкімінің, Мәслихаттың "Құрмет грамотасымен", Н.Ә.Назарбаевтың "Алғыс хатымен", "Қарақия ауданының Құрметті азаматы" атағымен, "Маңғыстаугеологияға - 50 жыл" және "Құрмет медалімен" марапатталған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.