Қысқа дайындық: Маңғыстауда көктайғаққа қарсы 800 тонна тұз дайындалды

Маңғыстау облысында қыс мезгілінде республикалық маңыздағы автомобиль жолдары жұмыс жасауға дайын. Көктайғаққа қарсы жолдарға 800 тонна тұз дайындалды. Бұл туралы Қоғамдық коммуникация орталығында өткен брифингте «Қазавтожол» РМК Маңғыстау облыстық филиалы директорының орынбасары Арман Жолдықұлов айтты, - деп хабарлайды mangystaumedia.kz сайты.

Оның айтуынша, тұздан бөлек 2333 текше метр құм және 40 тонна айсмикс материалы дайындалған. Құм жергілікті карьерлерден, ал тұз «Оймашы» карьерінен жеткізіледі.

- Өңірде республикалық маңызы бар автожолдардың жалпы ұзындығы – 1013 шақырым. Жолды күтіп ұстау үшін 4 жол пайдалану учаскесі қызмет көрсетеді. Онда жылыту пункттері және құм базалары (пескобазы) бар. Сондай-ақ «Бейнеу-Ақжігіт – Өзбекстан Республикасы» автожолының 85 шақырымында Тәжен селосында жылыту пункті салынған. Жетібай ауылында және Маната асуында қосымша құм базалары құрылды. Бүгінгі таңда облыстық «Қазақавтодор» филиалында 100-ге тарта адам, автожолдарды қыста күтіп ұстауға арналған 27 техника жұмыс істейді, - деді Арман Жолдықұлов.

Ал облыстық жолаушылар көлігі және автомобиль жолдары басқармасының басшысы Адайбек Қалиевтың айтуынша, 1028 шақырым автомобиль жолдарын күту және пайдалануға жарамды күйде ұстауға мекемелер бекітілген.

- 2022 жылдың соңында мердігерлермен арадағы келісімшарт мерзімі аяқталады және 2023-2025 жылдарға күтіп ұстау қызметі бойынша мемлекеттік сатып алу конкурсы ұйымдастырылады. Бүгінгі күнге дейінгі жасақталған келісімшартқа сәйкес, әр мекеме өздеріне тиесілі жолдарды қыс мезгілінде қардың шөгінділерінен, үйінділерден қорғау, қардан тазарту, қысқы тайғақ пен мұздың пайда болуын болдырмайтын жұмыстар мен шаралар алу, қозғалыс қауіпсіздігін ұйымдастыру және қамтамасыз ету бойынша жұмыстар(жол жиегіндегі қоқыстарды тазалау, жол белгілерін жуу немесе ауыстыру, автожолдарды жамау) жүргізіледі, - деді Адайбек Қалиев.

Ал Маңғыстау облыстық төтенше жағдайлар департаменті бастығының орынбасары Нұрлыбек Айжарықовтың айтуынша, 34 құрылым, 867 адам және 318 бірлік техника жолдардағы төтенше жағдайдың алдын-алуға, оны жоюға дайын тұр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.