18-19 қараша күндері аралығында Ақтау қаласында “Досан Батыр” спорт кешенінде “ақ жағалылар” арасында бокстан турнир өткізілді. Турнирге құқық қорғау органдары қызметкерлерінен Ақтау қаласы Полиция басқармасы Патрульдік полиция батальонынан 4 қызметкер қатысты. Олардың төртеуі де жүлделі орындарға ие болды, деп хабарлайды mangystaumedia.kz облыстық ПД-ға сілтеме жасап.
Мәселен, 60 келі салмақ дәрежесінде екінші орынға ППБ қызмет инспекторы полиция аға лейтенанты Мұсахан Мамырханов ие болды. Атап өту керек, Мұсахан өткен турнирде де күміс медальға ие болды. Турнирде 85 келі салмақ дәрежесінде бақ сынасып, бірінші орынды патрульдік полиция батальонының қызмет инспекторы полиция лейтенанты Ақжами Ақмолдаев иеленсе, үшінші орынды ППБ қызмет инспекторы полиция аға лейтенанты Жұмағазиев Батыржан иеленді. Сондай-ақ, патрульдік полицияның қызмет инспекторы полиция аға лейтенанты Ербол Маметов 80 келі салмақ дәрежесіндегілер арасынан 3 орынды иеленді.
Турнир ұйымдастырушылары қызметкерлердің қызығушылықтарын аяқ асты етпей, олардың физикалық тұрғыдан дайындалуына жағдай жасап, олардың жеңімпаз атануларына ықпал еткен басшыларына алғысын білдірді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
