Тағдырдың жазуына бой бермей, дүниенің тетігіне кірпіш болып қалана білген адамдар көп. Бойда қан, жүректе намыс пен мейірімділік, жігер барда пенде шіркін жасымайды. Осы тұста біз үстел теннисінен Қазақстанның үш дүркін чемпионы Мейірбек Ілесбайұлы жайлы жазуды жөн көрдік. Ол - аймақтың атынан үстел теннисінен пара Азия ойындарына қатысқан алғашқы маңғыстаулық.
Мейірбек қазір Ақтау қалалық мәслихатының депутаты. Көтеріп жүрген негізгі мәселесі – мүмкіндігі шектеулі жандардың спортпен айналысуы үшін дұрыс жағдайдың жасалуы. Ол бұл мәселелерді не үшін көтеріп жүр? Қиын кезде тағдырдың қиындығына мойымай, қалай төтеп бере алды? Бәрін басынан бастайық.
Мейірбек 1990 жылы дүниеге келген. 2007 жылы мектепті тәмамдаған соң М.Тынышпаев атындағы Қазақ көлік және коммуникациялар академиясының Ақтау қаласындағы колледжіне оқуға түседі. Теміржол саласының мамандығын алып шыққан соң, 2011 жылы поезд құрастырушы маман болып жұмысқа орналасады. Үйленіп, екі ұлды болады.
Мейірбек үшін екінші өмір 2012 жылдың қараша айында басталады. Рельс астына түсіп қалған ол сол қолы мен аяғынан айырылады.
- Сау жүрген кезім мен мүгедектік арбасына таңылған кез – екеуі екі өмір дер едім. Оқыс оқиғадан соң 10-15 күндей Ақтау қаласында ауруханада жаттым. Сосын мені санавиациямен Астанаға жөнелтті. Біраз ем қабылдап, Ақтауға оралдым. Протез салдыруға алғаш рет 2014 жылы Алматыға бардым. Сол жерде жағдайлары менен де мүшкіл адамдарды көріп, мен тәубаға келдім, сабақ алдым. Протез алуға келмес бұрын, үйде отырып өзімді жегідей жей беретінмін, ендігі өмірімді елестете алмайтынмын. Алматыға барған сапардан соң Ақтауға жаңа көзқарас, жаңа мақсаттармен оралдым, - дейді Мейірбек.
Ақтауға келген соң мүмкіндігі шектеулі жандарға арналған спорт клубын іздестіре бастайды. 2017 жылдан бастап спортқа бет бұрады. Алғашында Нұрбек Қожабеков бапкері болып, жеңіл атлетиканының қыр-сырын үйретеді. Атырау қаласына спартакиадаға аттанады. Бапкерінің кеңесімен үстел теннисімен де айналыса бастайды. Үстел теннисі жарысына да қатысқан Мейірбек жанына осы саланың жақын екенін түсінеді.
-6 жылдай кәсіби түрде үстел теннисімен айналысып келемін. Қазір Ақтау қалалық мәслихатының депутатымын. Негізгі бағдарламам – мүмкіндігі шектеулі жандардың спортпен айналысуына жағдай жасау. Азия ойындарынан келген соң облыс әкімі Нұрлан Ноғаевтың қабылдауында болдық. Сол кезде мүмкіндігі шектеулі жандарға арналған спорт зал мәселесін қозғадық. Негізі бізге 27 шағын аудандағы №16 мектептің ғимараты жанынан ангарный клуб салып берген. Ол жерде мүмкіндігі шектеулі жандар түрлі спорт түрімен айналысатындықтан, тарлық етуде. Сондықтан жеңіл атлетикаға қатысатындар «Каспий» спорт клубына барып дайындалып жүр. Зіл темірші спортшылар болса «Маңғыстау Аренаға» дайындалуға кетеді. Айтарым, облыстағы мүмкіндігі шектеулі жандарға әмбебап спортзалы қажет. Мүмкіндігі шектеулі жандарға арналған спорт түрінің барлығын бір жерге шоғырландыру қажет деп санаймын. Аймақ басшысы ұсынысымызды тыңдап, көмек болатынын жеткізді, - дейді ол.
Оның айтуынша, көшедегі билбордтарда да түрлі салада жетістікке жеткен мүмкіндігі шектеулі жандарды көбірек насихаттау қажет. Себебі, мұндай насихат осындай жағдайға түскен жандарға жарық сәуле, демеу, алға жылжуға себеп болады.
-Тағдырдың сынына түскен жандар қоғаммен араласудан қорықпаулары керек. Бір мысал айтып өтейін, Астанадан ем қабылдап келген соң бірде жұбайыммен базарға бардық. Жұбайым бір жұмыстарымен бірер минутқа кетіп, мен оны күтіп тұрсам бір адам келіп 50 теңге ұстатты. Мен ол жерде садақа тілеп емес, адам күтіп тұрғанымды қайдан білсін, көзіме жас келді. Әйеліме дереу телефон соғып, «тез шық» деп, киім де алмастан базардан кетіп қалғанмын. Сол күні көп ойландым. Өзімді тағы да қамшылауға, жігер беруге тура келді. Қазір сондай жағдайлар болмайды емес болады, егер маған көшеде біреу тиын берсе, күліп кете беретін болдым. Мен енді өзгелерге күш-жігер беріп, мүмкіндігі шектеулі жандардың қоғаммен араласуына себеп болғым келеді. Қазір мүмкіндігі шектеулі жандарға қоғамның көзқарасы да өзгеріп келеді. Себебі, ешкім білмейді, алда не күтіп тұрғанын. Әлі бапкер емеспін, оқуымды тәмамдап дипломымды қолға алсам, спортшыларды түрлі ойындарға дайындағым келеді, - дейді Мейірбек.
Тағдыр сынына мойымаған Мейірбек осы оқиғадан соң тағы да екі ұлды болды. Қазір ата-анасы Мейірбектің қолында, төрт ұлына тәрбие беріп отырған үлгілі әке.
Кәмшат СӘРСЕНБАЕВА