Бүгін Маңғыстау облысы әкімінің орынбасары Звира Есбергенова мен Ақтау қаласының әкімі Ұлықбек Тналиев бастаған мемлекеттік қызметкерлер өңірлік газеттерге жазылды.
«Маңғыстау-Медиа» медиахолдингіне баспасөзге жазылу үшін арнайы келген облыс әкімінің әлеуметтік салаға жауапты орынбасары Звира Түгелқызы бұқаралық ақпарат құралдарының, оның ішінде мерзімді баспасөздің маңызына тоқталды және барлық әріптестері мен маңғыстаулықтарды газетке жазылуға шақырды.
Сондай-ақ, Ақтау қаласының әкімдігіне қарасты бөлім басшылары мен әкім орынбасарлары және қалаға қарасты ауыл әкімдері толықтай облыстық газеттерге жазылды. Ал қала басшысы Ұлықбек Тналиев серіктестіктен шығатын сегіз газеттің де оқырманы атанды.
«Газет – бұл жәй ақпарат көзі ғана емес, мықты идеология құралы. Біз жан-жақты сараланған шынайы мақаланы газеттерден оқимыз. Руханият пен мәдениет, тарих пен тағылымды да осы басылымдардан табамыз. Сондықтан, газетке жазылуға келгенде аудан, қала деп бөлінбеуіміз керек. Мен қала әкімі болсам да, аудан газеттеріне де қолдау көрсетуді азаматтық борышым деп санаймын, - деді Ұлықбек Серікұлы.