Сейсенбі күні жаңаөзендіктер «Ozen cinema» кинотеатрында «A Group Entertainment» медиа-маркетингтік орталығы ұсынған «Қараша» қысқаметражды фильмнің тұсаукесерінде болды. Небәрі 15 минуттық фильмнің айтар ойы ірі, деңгейі жоғары.
«Қараша» жастар арасындағы қылмысты, жұмыссыздықты көрсете отырып, күрделі әлеуметтік мәселелерді қозғайды. Фильм адам өміріндегі болмашы, бір қарағанда түкке тұрмайтын кішкентай қателіктің арты орны толмас қайғыға душар етіп, бір емес бірнеше жанның жас ғұмырын талқандауы мүмкін екендігін көрерменге жеткізгісі келеді.
Басты кейпікердің бірі жұмыссыз, жалқау, жатыпішер, күндіз ұйқыдан, түнде қыдырыстан қолы босамайтын қызуқанды жігіт. Екіншісі болашағынан зор үміт күттіретін, бір-екі күнде халықаралық турнирге аттанайын деп отырған жас спортшы. Екеуінің тағдыры бір сәтте қиылысып, бірі мәңгілік мүгедек болып, екіншісі 11 жылға бас бостандығынан айырылып кете барады. Ең өкініштісі сол, фильм бірнеше жыл бұрын қалада орын алған шынайы оқиғаның желісімен түсірілген.
Фильмнің режиссері Саяхат Әндіровтың видео саласында жүргеніне 4 жылдың айналасы болған. Бастапқыда той, мерекелерді түсірумен айналысқан Саяхат қазір түрлі жарнамалық роликтер жасап жүргенін айтады.
- Көптен бері командамыздағы жігіттермен өзімізді кино саласында сынап көруді ойлап жүргенбіз. Соның сәті енді келгендей. Бұл фильмде біз жастарды жаман әдеттерден аулақ болуға шақырамыз. Кейіпкерлеріміздің барлығы да жергілікті жастар. Бәрі де тегін түсуге келісім берді. Видеограф, фотограф, монтажер, дизайнер, художник мамандарының бәрі өз ішімізде болғандықтан фильмге ешқандай қаржы шықты деп айта алмаймын. Алғашқы туынды болғандықтан кемшіліктер де жоқ емес, бірақ алда кино әлемінде бұдан да керемет, сапалы дүниелер шығарамыз деген ойдамын - дейді С. Әндіров.
Берік Сұңғатов пен Нұрлыбай Жұмағалиев, фильмдегі басты кейіпкерлер: - Біздерге сенім артып, өзімізді кино саласында байқап көруге мүмкіндік берген «A Group Entertainment»-ке рахметімізді айтамыз. Бұрын да сахнада жүрміз, жарнамалық роликтерге түсіп жүрміз, бірақ кино әлемі мүлде бөлек дүние екен. Қиындығы өз алдына бір төбе, - деп қобалжығандарын жасырмады.
Фильмді көпшілік жылы қабылдап, жоғары баға берді. Кино көруге келген «Өзенмұнайгаз» АҚ Жас мамандар кеңесінің төрағасы Б.Бәйімбетов фильмнің арасында қолданылған қазақ ғұламаларының нақыл, өсиет сөздеріне риза болғандығын айтып, киноның осы сәттерін әйгілі Гай Ричидің «Револьверіне» теңеді.
Айжан НАСЫРОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
