Ақшұқырлықтар әкімге ауылды жақсарту жөніндегі ұсынысын жеткізді

Ақшұқыр ауылының тұрғындары ауыл әкімі Айсағали Нұғымановтың есеп беру жиынында бір емес, бірнеше ұсыныс көтерілді. Ел қоныстанған жерде мәселе болатыны анық. Ақшұқырлықтар соңғы кездері көше жарығы, жаз мезгілдерінде ауыз судың кезегі және ауылішілік асфальт жолдардың жоқтығын мәселе етеді. Соңғы кездері деп айтуымыздың өзінде де мән бар, себебі ауыл соңғы 3-5 жылдың өзінде үлкейіп, тұрғындардың көбейіп, жаңа көшелер пайда болды. Жаңа көшелерге инфрақұрылым тарту мәселесі әр жыл сайын азайды дегенмен, өз мәселесін бірден толық шеше алмайтыны тағы бар. Оның үстіне бұрынғы көшелердегі жолдар мен жарық бағаналарының ескіруі де ауыстыру жұмыстарын қажет етеді. – Биыл жергілікті бюджеттен түскен қаржының 7 млн теңгесін өзіміз игеруге мүмкіндік алып отырмыз. Жергілікті бюджет дегеніміз ауыл тұрғындарының түрлі салықтарынан түскен қаржысы. Ауылішілік жолдарды салу және күтуге осы қаржы жұмсалатын болады. Аудан орталығынан алыс орналасқандықтан халыққа қызмет көрсету орталығы қызметі де тұрғындарға мәселе тудыруда. Ауыл әкімі аппаратының жаңа ғимараты салынатын болса, оның бір жағын қызмет орталығы ету жоспарда бар. Ауылда жас мамандарға арнап салынатын жаңа құрылыс жүретін болады. Интернет мәселесі де түбегейлі шешімін таппақ, - деген ауыл әкімі А.Нұғымановқа аудан әкімі А.Хамиев қатаң тапсырмасын да жүктеді. – Жасыратыны жоқ, ауылда заңсыз салынған нысан, қызмет көрсету орындары бар. Осы заңсыз объектілерді анықтауды талап етемін. Барлығын заңға сәйкестендіріп, салығы қазынаға түссін. Әйтпеген күнде оның жарығын, жылуын тоқтатып тастауды бұйырамын, - деді аудан әкімі. Ауыл тұрғындары елдік мәселеде ауызбіршілік танытып, өздері тарапынан ұсыныстарын жеткізді. Амантай Тәжібаев ауылдастарына: - Ауылда қоқыс көп. Сол қоқыс басқа жерден келмейді, өзіміздің тұтынған нәрсеміз. Ауыл тазалығын сақтауға барлығымыз жауапты болғанымыз жөн. Өз басым қоқысты жөн-жосықсыз тастап жатқан тұрғындарды көріп, бір-екі рет түсіндіріп айтқаным бар. Одан бөлек тұрғындарды аулаларын көгалдандыруға шақырамын. Ауламда 15 түп жеміс талым бар, 8 шыбықты осы жылға отырғызуға дайындап отырмын. Жеміс-жидек, көкөніс те өсіремін. Әр аулада азды-көпті ағаш егілсе, ауылымыз қандай көгалды мекен болар еді?! – деді. Әрдайым өз ұсынысын жеткізіп жүретін белсенді жас Аққалам осы жолы ауыл тазалығына қатысты ұсынысын басшылықтарға қарата айтты: - Мектеп оқушыларына тазалық сақтауға қатысты түсіндірме жұмыстарын жүргізу жобасы енгізілсе, мектеп, ата-аналар, ұстаздар болып біріккен жоба өз нәтижесін береріне сенемін. Болашақта Германия тәрізді тазалық үлгісіне жететін боламыз, - деді. Ауыл жасы Нұрбек Шүкірбаев та жастарды белсенді болуға шақырды. Жапар Тарғын есімді ауыл тұрғыны өз сөзін барлық ауылдасына қарата айтты: - Адам болғасын ауру-сырқау берілмей тұрмайды. Отбасымызға түскен осындай сынақта ауылдастардың үлкен көмегін көрдім. Бір-бірімізге ілтипат көрсетіп, бірлігімізді көрсете білген азаматтарға алғысым шексіз, - деді. Түпқараған ауданының әкімі А.Хамиев жиын қорытындысында ауылдың дамуына үлес қосып жүрген тұрғындарға «Алғыс хат» табыс етті.

Клара ҚАНСҰЛТАНОВА