Жаңаөзеннің 50 жылдығына орай ардагерлерге төсбелгі табысталды

©

Жаңаөзен қаласының әкімі Әділбек Дауылбаев қаланың дамуына, өсіп-өркендеуіне елеулі үлес қосқан ардагерлер мен құрметті азаматтарды, мәслихат депутаттарын, медицина және мемлекеттік қызмет салаларының мамандарын, қоғамдық бірлестік жетекшілерін Жаңаөзен қаласының 50 жылдығына арналған төсбелгімен марапаттады.

Сонымен қатар, мерейтой қарсаңында жарық көрген мұнайлы мекен Жаңаөзеннің тарихы мен оның даму жолында еңбек еткен тұлғалардың өмірі мен қызметі жөнінде, кейінгі ұрпаққа мұра ретінде жинақталып, жасақталған «Қойнауы құтты Жаңаөзен» атты танымдық-энциклопедиялық кітап алғаш болып медаль иелеріне сый ретінде табыс етілді.

Шара барысында қала әкімі барлық қатысушыларды Жаңаөзен қаласының 50 жылдық мерейтойымен құттықтап, қазан айының 19-20 күндері аталып өтілетін ауқымды мерекелік шараның барысын қысқаша айтып өтті:

- Биылғы қазанның 19-21 аралығын нақты сол күнге белгіледік. Соған байланысты қаламызға еңбек еткен республиканың түкпір-түкпірінде және шетелдерде жүрген азаматтардың бәрін арнайы шақыруға тырыстық. Айтылған күнге сол қонақтарымызды алыс-жақыннан келеді деп күтіп отырмыз. Соған байланысты жасақталған арнайы бағдарламалар бар. Қонақтарымызға жақсы көңіл-күй сыйлап, 50 жылдық мерекемізді ұйымшылдықпен өткіземіз деп отырмыз. 19-20 қазан күндері арнайы қонақасылар ұйымдастырылады. Жұрт қызықтап, демалысын көңілді өткізсін деген оймен республикамызға белгілі өнерпаздарды алдырып жатырмыз. Концерттік бағдарламаларды халықтың жақсы көретін қолайлы орындарына ұйымдастыруды жөн көрдік. Көпке танымал ақындарымызды шақыртып жатырмыз. Оларды көрермен қауым алаңдар мен стадионда тамашалай алады. Сондықтан сүйікті қаламыздың жарты ғасырлық тойына келіңіздер, құрметті қауым! Баршаңызға құшағымыз айқара ашық. Мереке баршамызға құтты болсын! – деді Әділбек Құлынтайұлы.

Сонымен бірге, марапат иелерінің бірі Жаңаөзен қаласындағы мемлекеттік қызмет саласының ардагері Ізбас Бексары Бөлтейұлы 46 жылдық еңбек өтілінің 30 жылында мемлекеттік қызметте болған:

- Жаңаөзен қаласының 50 жылдығының тойлануы жаңа басталғалы жатыр, бірақ тойдың болғанынан боладысы қызық деп дайындық жұмыстары жылдың басынан басталып кеткен болатын. Алғаш болып мереке алдында қаламыздың ардагерлерін құрметтеп, марапаттап жатқанына үлкен алғыс. Қаламыздың 50 жылдығы құтты болсын. Көркейе берсін! – деп ақ тілегін білдірді.

Айтолқын МЕҢДІБАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.