Бүгін Маңғыстауда «Асқақ ордам-Астана» атты Президенттік жаңа жылдық шыршасы өтті, - деп хабарлады Маңғыстау облысы әкімінің баспасөз қызметі.
Мерекелік шараға ата-аналарының қамқорлығынсыз қалған, аз қамтылған, мүжәлсіз отбасы балалары мен отбасы үлгісіндегі балалар ауылының тәрбиеленушілері қатысты. Жаңа жылдық шыршаға барлығы 9-13 жас аралығында 200 бала жиналды.
Бүлдіршіндерге арнайы дайындалған мерекелік бағдарлама көрсетілді. Оған театрдың әртістері мен маңғыстаулық өнер жұлдыздары өнер көрсетті. Балалар үлкен шыршаны айнала ән айтып, би билеп, Аяз ата мен Ақшақарға өз өнерлерін көрсетті. Бейнетаспа арқылы Елбасы Нұрсұлтан Назарбаев қатысушыларды келе жатқан Жаңа жыл мерекесімен құттықтап, оларға зор денсаулық, жаңа жетістіктер мен барлық армандарының орындалуын, жақсы оқып, сапалы білім алып, мақсаттарына жете білулерін тіледі.
«Сіздер - Қазақстанның болашағы, тәуелсіз елдің ұрпағысыздар. Сондықтан туған елдің лайықты азаматтары болуы үшін білімді болып ер жетулерің тиіс. Жаңа жыл жақсылығымен келсін!» - деді облыс әкімі Ералы Тоғжанов.
Маңғыстау облысы әкімінің баспасөз қызметінің хабарлауынша, мерекелік кешке қатысушы балаларға Қазақстан Республикасының Президенті атынан күрте, спорттық киім, бас киім мен қысқы етіктер, тәтті сыйлықтар, ұялы телефон сыйға тартылды. Сонымен қатар әр балаға танымдық кітаптар (үш тілде) тарту етілді.
"Бүгін Аяз-Ата, Ақшақармен қол ұстасып биледім, шырша көңілді өтті. Президент теледидар арқылы бәрімізді жаңа жылмен құттықтады. Мен оған қуаныштымын", - дейді Айкүн есімді бүлдіршін.
Сондай-ақ осы күні 14 дарынды (республикалық, облыстық байқаудың жеңімпаз) оқушы «Балдәурен» республикалық оқу-сауықтыру орталығында өтетін жаңа жылдық шыршаға жолдама алды.
Камшат ОҢҒАЛТАЙ
Суреттерді түсірген Серік МАЙЕМЕРОВ
[gallery td_select_gallery_slide="slide" ids="45234,45235"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
