Жағалық күзет өңірлік басқармасына қатысты әскери бөлімдердің қатысуымен Тәуелсіздік күні мерекесіне арналып өткізілген іс-шарада үздік қызметімен көрінген бір топ ел күзетіндегі жауынгерлерге марапаттары табыс етілді.
Өмірзақ кентіндегі 2201 әскери бөлімнің клуб іші толы. Әскери міндетін өтеп жатқандармен бірге ертеңгі ел қорғаны, әскери мамандықты таңдаған оқушылар да осында бас қосыпты. Олар мында қару-жарақ түрлері, әскери техникалармен танысып, арнайы лагерьде болып, жиі болып тұрады екен. Мектептер мен әскери бөлімдер арасындағы жақсы байланыстың оң нәтижесі де жоқ емес. Бұл жайында кейін кеңірек көсіліп, айта жатармыз.
«Ту астына тік тұр» әмірімен жеке құрам орнынан тұрып, құрмет көрсетілді. Тәуелсіздік күні мерекесінде бас қосқан үш әскери бөлімнің жауынгерлік тулары сахнада орны алды. Қазақстан Республикасының әнұраны орындалды.
« Егемендік –ел бақыты, ертеңі,
О,халайық, құтты болсын қуаныш!
Құтты болсын, Тәуелсіздік мерекесі,
Мықты болсын елімнің керегесі!»,-деп салтанатты бастап кеткен жүргізушілер –капитан Е.Сүлейменов пен 1 сатылы старшина П.Амантаева мереке ажарын аша түсті.
- Құрметті отандастар! Бүгінгі салтанатта жүздесіп отырғанымызға қуаныштымын.Егеменді еліміздің ең ұлық, ең қастерлі мерекесі-Қазақстан Республикасының Тәуелсіздік күні мерекесі құтты болсын! Баршаңызға мықты денсаулық, табыстар, отбасылық қуаныштар тілеймін, - деді құттықтау сөзінде Жағалық күзет өңірлік басқармасының бастығы, полковник Алибек Каюпов.
Алибек Амангелдіұлы жыл қорытындысы бойынша түрлі номинациялар бойынша жеңімпаздарды марапаттады. 2018 әскери бөлімнің шекаралық бақылау бөлімі «Үздік шекаралық бақылау бөлімі», 2201 «А» әскери бөлімнің «Сарбаз» шекаралық кораблі «Үздік шекаралық корабль», 2201 «А» әскери бөлімнің азық-түлік қызметінің бастығы, капитан Н.Мұқажанов «Үздік азық-түлік қызметінің бастығы», 2018 әскери бөлімнің «Ақтау» теңіз порты ТӘҚЖ бойынша шекаралық бақылау бөлімі бастығының орынбасары, капитан А.Айтубаев «Үздік тәрбиелік құрылымның әскери қызметкері», 2201 «А» әскери бөлімнің автомобильдік қызметінің бастығы, аға лейтенант Б.Рахышев «Үздік автотехникалық қамтамасыз ету маманы», 2018 әскери бөлімнің десанттық –шабуылшылар тобының бастығы, аға лейтенент Е.Төреәлі «Үздік барлау-іздестіріу тобының үлкені» номнациялары бойынша үздік деп танылды. «Үздік қарауыл бастығы», «Үздік дәрігер», «Үздік қарауыл бастығы», «Үздік заңгер маман», « Үздік кочегар –жағушы», «Үздік инженер маман», «Үздік тергеуші офицер»,»Үздік ақпараттық технологиялық-техник маманы» номинацияларының жеңімпаздары аталды.
Салтанаттың екінші бөлімі концерттік бағдарламаға арналды. Жауынгер Қуаныш Ахметов «Мен қазақпын» әнін әуелете шырқады. Әскери оркестрдің сүйемелдеуімен Махаббат Тұрғалиев орындаған «Жауынгерлер», «Атамекен» әндеріне, жасөрен бишілер мен әншілердің көрсеткен өнеріне ризашылықпен қол соқтық.
Ия, Тәуелсіздік күні -Қазақ елі тарихындағы ең қастерлі, қазақ халқының сан ғасырлық арманының орындалған күні. Егемендік алғаннан бері Қазақстан өзін әлемге әйгілі, бейбітшілікті мұрат еткен ел ретінде танытты. Жер бетінде әрдайым достық салтанат құрып, келісім орнап, келешегіміз жарқын болғай! Тыныштығымыздың күзеткен шекарашы жауынгерлеріміз Қазақстан Республикасы Тәуелсіздігінің 26 жылдығын лайықты табыстармен, жақсы көңіл күйде қарсы алып отыр. Олардың тынымсыз әскери қызметі, қырағылы қандай мапапатқа да лайық. Жер бетінде әрдайым достық салтанат құрып, келісім орнап, келешегіміз жарқын болғай!
Болат ҮМБЕТОВ
Суреттерді түсірген Талант ҚҰСАЙЫН
[gallery td_select_gallery_slide="slide" ids="45039,45040,45043,45042,45041,45045,45044"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
