©
Кездейсоқ жарақат алып, аяқ асты апатқа тап болудан ешкім де сақтандырылмаған. Ерсілі-қарсылы ағылған көліктің көптігі, орынды-орынсыз қолданылатын техникалық құралдардың молшылығы тілсіз жаудың қатарын көбейтіп жатқаны жасырын емес. Бұған қоғамда орын алған арақ ішу, есірткіге құмарту сияқты зиянды әдеттерді қоссаңыз, адамның апатқа ұшырау себептері арта түспек. Күн құрғатпай болып жатқан мұндай жайттардың алдын алу үшін қолданылатын әдістердің бірі—жастар арасында олардың назарын аудартатын қызықты шараларды жиі ұйымдастыру.
Жақында салауатты өмір салтын қалыптастыру проблемаларының облыстық орталығының (СӨСҚПО) мұрындық болуымен «Қолдау-Қазақстан» көпсалалы коммерциялық холдингі Мұнайлы ауданының Маңғыстау ауылындағы №5 орта мектепте «Жол жарақатының алдын алу», «Төтенше жағдайлар» және «Салауатты өмір салтын ұстану қағидалары» тақырыптарын қамтыған шара өткізді. Балалармен басқосудың бастапқы бөлімінде мектептің алғашқы әскери дайындық пәні мұғалімі Ж.Қарасартов оқушыларға төтенше жағдайлар жайында мағлұмат беріп, арнайы бейнеролик көрсетілді.
Мұнайлы аудандық «Жедел жәрдем» бөлімінің фельдшері А.Қараев дәрігерге дейінгі алғашқы көмек көрсету тәсілін іс жүзінде көрсетіп, түсіндірді. Ал орталық емхананың аудан бойынша психиатр-дәрігері Г.Айтжанова «Зиянды әдеттерден аулақ болайық» тақырыбында дәріс оқып, симмуляциялық құралдар арқылы ішімдік ішу, темекі шегіп, насыбай ату, нашақорлық сияқты әдеттердің зияны жөнінде толық ақпарат берсе, психолог маман А.Құдайбергенова оқушыларға «Танысу» және «Табиғат аясында» тақырыптарында тренингтер өткізді.
Сондай-ақ СӨСҚПО аудандық филиалының мамандары ақпараттық танымдық материалдар таратып, тақырыпқа сай бейнероликтер көрсетті. Шара соңында «Қолдау Қазақстан» көпсалалы коммерциялық емес холдингінің директоры Ляззат Досметова белсене қатысқан оқушыларға сыйлықтар табыстады.
Тағы оқыңыздар: Маңғыстауда жыл басынан бері өрттен 5 адам қаза тапқан- Басқосуда емен-жарқын әңгімелесіп, көкейдегі сұрақтарына жауап алған жастар бұл кездесуде өздерін барынша еркін ұстады және ойларын ашық жеткізе алатындарын байқатты, - дейді Ляззат Мұстажебқызы. - Оқушылардың белсенділігі жоғары, олардың барлық салаға деген қызығушылығы көрініп тұрды. Біз үшін балалардың тәнінің де, жанының да саулығы қымбат қой. Ал мұндай шараларды оқушылар үшін тартымды да түсінікті етіп ұйымдастыру арқылы олардың болашаққа деген ынта-жігерін арттырумен қатар жаман әдеттерден бойларын аулақ ұстайтын, қоғамның белсенді азаматтарын қалыптастыруға болатыны сөзсіз.
Валентина ҚОЗЫБАҚОВА
[gallery td_select_gallery_slide="slide" ids="38506,38501,38504"]