Маңғыстаудағы әскерге шақыру науқаны: Алғашқы лек шекара қызметіне аттанды

Маңғыстау облысындс күзгі әскерге шақыру науқаны басталды. Азаматтардың алғашқы легі ҚР Ұлттық қауіпсіздік комитеті Шекара қызметіне аттанды, деп хабарлайды mangystaumedia.kz Ақтау гарнизонының баспасөз қызметіне сілтеме жасап.

Әскерге шақыру науқаны 1-қыркүйекте басталды. Дәстүр бойынша Ұлттық қауіпсіздік комитеті Шекара қызметінің бөлімшелері алғаш болып жасақталды.

-Біз әскерге бірінші кезекте еліміздің шекара қызметіне қажет жауынгерлерді жібереміз. Бүгін алғашқы әскери команданы аттандырамыз. Онда 6 азамат бар. Шекара қызметінен кейін азаматтар Қазақстан Республикасының қарулы күштеріне барады. Одан соң дәстүрлі түрде ұлттық гвардияда әскери борышын өтейді, - дейді әскери қызметке шақыру бөлімінің басшысы Талғат Сарбасов.

Жалпы биыл 700-ден астам маңғыстаулық Отан алдындағы борышын өтейді деп жоспарланған. Оның 300-ге жуығы Қарулы Күштерге, 230-дан астамы Ұлттық ұланға, 170-тен астамы Ұлттық қауіпсіздік комитетінің Шекара қызметіне шақырылады. Әскерге 18-27 жас аралығындағы азаматтар барады.

Әскерге шақыру барысында азаматтарды хабардар ету үшін SMS-хабарлама жолданады. Сондай-ақ, үй мен жұмыс мекен-жайларына шақыру қағаздары жіберіледі.

Әскерге шақыру науқаны 31 желтоқсанға дейін жалғасады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.