Маңғыстаулық студент Швейцариядағы халықаралық сайыста ел намысын қорғауда

Швейцария елінің Берн қаласында 7-10 қыркүйек аралығында «WorldSkills Competition 2022 Special Edition» халықаралық чемпионаты өтуде. Чемпионаттың «Прототиптеу» құзыреттілігі бойынша Бейнеу политехникалық колледжінің студенті Нұрасыл Мұханғалиев қатысып жатыр, деп хабарлайды mangystaumedia.kz Бейнеу ауданы әкімдігінің баспасөз қызметіне сілтеме жасап.

Бұған дейін «WORLDSKILLS» кәсіби шеберлік байқауының облыстық және республикалық кезеңі өткен болатын. Нұрасыл Мұханғалиев сол кезеңдерден сүрінбей өтіп,халықаралық додаға жолдама алды.

Бұл әлемдік сайыста инженерлік графика CAD, компьютерлік ойындарға арналған 3D модельдеу, ұшқышсыз ұшу аппараттарын басқару, ұялы робототехника, бейнеөндіріс және компьютерлік ойындар, прототиптеу мен мультимедиялық қосымшаларды дамыту сияқты 62 заманауи құзіреттіліктер қарастырылған. Сайысқа 57 елден 1000 жоғарғы оқу орындарының студенттері қатысып жатыр.

- «WorldSkills» кәсіби шеберлік байқауы жұмысшы мамандықтардың мәртебесін арттырып, шығармашылыққа баулитын бірден бір байқау. Бәсекеге қабілетті маман қалыптастырып, елімізде сапалы кадрлер дайындау тұрғысында бұл чемпионаттың маңызы өте зор. Нұрасыл сайыс кезеңдерінен үздік шығып, бүкіл қазақ елінің намысын шет елде қорғауда. Ол біз үшін үлкен мәртебе әрі жақсы жетістік деп ойлаймын. Біз аламан сайысқа түскен өзіміздің шәкіртімізге сәттілік тілейміз,- деді Бейнеу политехникалық колледжінің директоры Нұрбол Бурин.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.