Шебір ауылының тұрғындары жолды бүлдірген тұз өндіретін компанияны жауапқа тартуды сұрайды

Маңғыстау ауданына қарасты Шебір тұрғындары ауыл іргесінде тұз өндіретін «Батыс Стандарт KZ» ЖШС-ны жауапқа тартуды сұрайды. Тұрғындардың сөзінше тұз өндіретін компанияның ауыр жүк көліктері Шебір ауылынан Қаламқас кенорнының асфальтына шығатын жолды бүлдірген, - деп хабарлайды mangystaumedia.kz.

Бүлдіргені сонша, қазір ол жолмен жол талғамайтын көліктеріміз жүре алмай қалды деп шағымданады. Сондай-ақ ауыл халқы тонналаған өнімді таситын көліктер жолда батып қалып, одан шығу үшін тұз төккенін айтады. Осылайша экологияға кері әсер ететін әрекет жасап жатыр деп ұрпақ денсаулығына алаңдаулы.

- Бұл компания бұл жерде жұмыс істеп жатқанына анық 5 жылдан асып кетті. Алайда компания осында келмес бұрын маңындағы ауыл тұрғындарына қоғамдық тыңдау өткізбеді. Енді нәтидесі осы – жолымыздың бәрін бүлдіріп, жарамсыз жағдайға жеткізді. Тіпті ауыр жүк көліктері соңында жолсызбен жүріп, жайылымдық жердің өсімдік қабатын әбден бүлдіріп тастады. Аудан әкіміне осы компанияның басшыларымен кездестіріңіз деп жүргеніме 3 айдың жүзі болды. Бірақ әкімнен де хабар жоқ, - дейді Жанғазы Оспанов.

Бұдан бөлек ауыл азаматтары бұл серіктестік Шебір ауылынан 1,5 шақырым қашықтықта тұз қоймасын ашық күйінде орналастырғанын айтады. Шебірліктер құзырлы органдардан «Батыс Стандарт KZ» ЖШС-на қатысты тексеріс жүргізіп, бақылау жасауды сұрайды. Одан басқа бүлінген жолдың «Батыс Стандарт KZ» ЖШС есебінен бастапқы қалпына келтірілуін талап етеді. Ал ауыл тұрғындарынң қозғалысына кедергі келтірмей, тұз тасымалы үшін бөлек жолдың салынуы дұрыс деп есептейді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.