Yessenov University Қазақстан бойынша 100 грант бөледі

«Yessenov Fest 2022» байқауы аясында өтетін «Yessenov» республикалық пән олимпиадасының қорытындысы бойынша «Jas Kasipker-2022» стартап жобалар байқауы және «YU Debate CUP-2022» турнирі жеңімпаздарына гранттар табысталады. Бұл туралы облыстық Қоғамдық коммуникация орталығында өткен брифингте Шахмардан Есенов атындағы Каспий мемлекеттік технологиялар және инжиниринг университетінің президенті Берік Ахметов айтты, - деп хабарлайды mangystaumedia.kz сайты.

Жыл сайын өтетін «Jas Kasipker-2022» стартаптар конкурсы 11-сынып оқушылары мен колледж түлектерінің кәсіпкерлік белсенділігін дамытуға бағытталған.

- Байқау жастардың бизнес-жобаларды әзірлеп, орындалуын қолдау мақсатында ұйымдастырылады. Сондай-ақ кәсіпкерлікке қолдау көрсету құралдарының қол жетімділігін кеңейтуге бағытталады. Үздік 30 жоба иегері оқуға грант алады,-деді Берік Ахметов.

Ал «YU Debate Cup IV» мектеп оқушыларының арасында республикалық пікірталас турнирінің мақсаты – оқушылар арасында жастардың сыни ойлауын дамыту, ел жастарын қоғамдық мәселелердің шешімін іздестіруге біріктіру, зияткерлік әлеуетін арттыру және дебат қозғалысын дамытуға жәрдемдесу. Турнир жеңімпаздарын анықталған соң арнайы 10 грант пен жеңілдіктер берілді.

Сонымен қатар Есенов пәндік олимпиадасында гранттың басым бөлігі, яғни 100-дің 60-ы бөлінеді. Қазақстанның барлық облысынан түрлі пәндік олимпиадада білімі мен күш-жігері арқылы орын алған оқушылар грантқа үміткер бола алады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.