Мұғалімдер Маңғыстауға келіп жұмыс жасаса, 800 мың теңгеге жақын айлық алады

Мұғалім жетіспейтін төрт өңірге (Маңғыстау, Атырау, Алматы, Түркістан) маман тарту үшін, осы жақтарға қоныс аударған ұстаздарға 1,5 есе артық жалақы төленетін болды, деп хабарлайды mangystaumedia.kz.

Мәжіліс депутаты Жәмилә Нұрманбетова мұғалім тапшы облыстарға барған ұстаздарға қандай әлеуметтік көмек көрсетілетінін сұрады:

"Нақтыланған республикалық бюджет жобасында Атырау, Маңғыстау, Алматы және Түркістан облыстарына екі мыңға жуық педагогті тарту үшін 3,9 млрд теңге көзделген. Бұл ретте, аталған қаражатта лауазымдық жалақыға 150% мөлшерінде қосымша жалақыға ынталандыру үстемақысына ғана шығыстар жоспарланған. Біз әлеуметтік қолдауға бағытталған басқа шығыстарды көрмей отырмыз. Осыған байланысты басқа елді мекендерден көшіп келген мұғалімдер үшін баспанамен қамту мәселесін қоса алғанда, әлеуметтік қолдау қандай болады?"

Білім министрі Асхат Аймағамбетов бұл жоба биыл қыркүйек айынан басталатынын мәлім етті. Ал, жобаға бөлінген 3,9 млрд теңге есебіне мұғалімдерге жалақы төлеу және тұрғын үй жалдау мен коммуналдық шығындарды өтеу де кіретінін айтты.

"Неге біз бұл мәселені жалақының ішінде қарастырып отырмыз? Себебі, біздің заңнамаға сәйкес, тұрғын үй жалдау мен коммуналдық төлемақыны тек жергілікті бюджеттен бере аламыз. Сондықтан жергілікті бюджетке ауырпалық түсірмес үшін және заңнаманы бұзбау үшін, бұл мәселені жалақы арқылы шешіп отырмыз. Мәселен, Атырау облысына көшіп баратын мұғалім қыркүйек айында жалақы алса, онда оның жалақысы 790 мың теңгеге жуық болады. Сол 790 мыңның 140 мыңға жуығы коммуналдық шығындар болады, ал 650 мың теңгеге жуығы - мұғалімнің өз жалақысы", - деп түсіндірді министр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.