Маңғыстауда «Қайырымдылық керуені» ІV республикалық байқауына өтінім қабылдау басталды. Бұл туралы Қоғамдық коммуникация орталығында өткен брифингіде белгілі болды, деп хабарлайды mangystaumedia.kz.
Облыстық ішкі саясат басқармасының Азаматтық қоғам ұйымдарымен жұмыс бөлімінің басшысы Бауыржан Әбдіқадыров қайырымдылық шараның маңыздылығы мен міндетіне тоқталып өтті.
«Бұл байқау елімізде игі іс жасайтын, қиын жағдайда қол ұшын созатын жандарды анықтауға, халықтың азаматтық бастамасын жандандыруға және адамгершілік құндылықтарды нығайтуға өз септігін тигізетіндігі сөзсіз», - деді Бауыржан Әбдіқадыров.
Маңғыстау облысы бойынша Іскер әйелдер қауымдастығының атқарушы директоры Динара Асанованың мәліметінше, бұл байқау жыл сайын Назарбаев Қоры, Қазақстанның іскер әйелдер қауымдастығы, «Оқжетпес» емдеу-сауықтыру кешені, «Хабар» агенттігі және «КТК» телеарнасының қолдауымен өткізіледі.
Оқи отырыңыз: Кімге төлеу керек? Тұрғындар энергия төлемдерінен шатасып жатыр
_C8YpdxRw7AhR4EnZ7okKQX1SAnlXJR.jpg)
«Байқауға әлеуметтік, қоғамдық мәселелерді шешуге үлестерін қосатын және өзгелерді өздерінің игі ісімен ынталандыратын жеке және заңды тұлғалар қатыса алады. Лауреаттар «Асар», «Туған жер», «Батыл жүрек», «Мейірім жолында», «Қайырымдылық тарихы», «Жануарға мейірім» және «Бала жүрегі» сынды номинациялар бойынша анықталады», - деді Динара Асанова.
Айта кетейік, байқауға кәсіпкерлік субъектілері, қайырымдылық қызметі мемлекеттік қолдаумен байланысты адамдар қатыса алмайды.
Сонымен қатар қайырымдылық байқауына қатысуға өтінімдер 2021 жылдың 30 қарашасына дейін қабылданады. Толық ақпаратты 8747 948 9214 нөміріне қоңырау шалып немесе www.fnn.kz және www.businesswomen.kz сайттарынан табуға болады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
