Қуаңшылық: Қыстан шығуға 77 мың тонна шөп керек

Қысқы мал азығын дайындауға республикалық бюджеттен 5,3 млрд теңге қаржы бөлінді. Оның 1,9 млрд теңге шөпке, 3,4 млрд теңге жем алуға жұмсалады, - дейді mangystaumedia.kz сайты.

Маңғыстау облысы әкімінің орынбасары Ғалымжан Ниязовтың айтуынша, аталған қаржыға жыл соңына дейін 26 мың тонна шөп пен 34 мың тонна жем сатып алынады. Қазір қысқы мал азығын жинақтау жұмыстары басталып кетті.

«Бүгінгі таңда қыркүйек, қараша айларына жем, шөп алу үшін тиісті қаржы «Каспий» ӘКК берілді. Яғни 1,6 млрд теңге 21,6 мың тонна шөп, 500 млн теңгеге 4,9 мың тонна жем сатып алынады. Осы жұмыстарды тиімді атқару үшін қазір ауыл, аудан, қала әкімдіктері «Каспий» ӘКК-ға операторларды ұсынып жатыр. Операторлар қаражатты алып, қысқа дейін шөп пен жемді жинайды. Содан соң мал азығы сатылады. Ал одан түскен қаржы мемлекетке қайтарылады», - дейді облыс әкімінің орынбасары Ғалымжан Ниязов.

Қыс айларында 1 келі шөп 74 теңге, 1 келі жемнің бағасы 102 теңге болмақ.

Жалпы облыста 636 824 бас мал тіркелген. Төрт түлікті наурызға дейін қысқы азықпен қамту үшін 77 мың тонна шөп керек.

Облыс әкімінің орынбасары Ғалымжан Ниязовтың айтуынша, былтыр 45 мың тонна шөпті облыс ішінен шауып, қалған 15 мың тонна шөпті сырттан алып келген. Ал биыл өңірде тек 10 мың тонна шөп шабылады. Қалған 67 мың тонна шөп сырттан алынады. Қазіргі таңда 41 470 тонна шөп көрші облыстардан әкелініп, сатылып жатыр.

Енді әр ауданға өзге облыстан тасымалданатын шөпке тоқталсақ. Қыркүйек, желтоқсан айларына өзге өңірлерден Маңғыстау ауданына 15 980 тонна шөп, Бейнеу ауданына 4 592 тонна, Қарақия ауданына 617 тонна, Түпқарағанға 3 267 тонна және Мұнайлы ауданына 1 074 тонна шөп керек. Осы ретте 5 шаруа қожалығы Атырау мен Ақтөбе облыстарының шабындық жерлерінен шөп шабуға кетті. Жергілікті «Кендірлі-Қаясан» мемлекеттік қорығы аймағында 4 бригада шөп шауып жатыр. Олар жыл аяғына дейін 10 мың тоннадан аса шөп жинауды жоспарлап отыр.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.