Әділ сайлау – саяси реформалар өзегі

Маңғыстау облысына арнайы іссапармен келген Мәжіліс депутаты, «Nur Otan» фракциясының мүшесі Саиров Ерлан Бияхметұлы «Kazakh osseter» зауытын аралап, кәсіпорын жай-күйімен танысты. Сондай-ақ Түпқараған ауданы Ақшұқыр ауылы әкімдігіне үміткер Еркебұлан Жәнібекпен бірге қоғам белсенділері, жас буын өкілдерімен жүздесіп, келелі мәселелер төңірегінде сөз қозғады.

Жас буынмен кездесу барысында халық қалаулысы өрелі әңгіме өрбітіп, ел дамуына соны серпін берер жасампаз бастамалардың ілкі бастауында тұрудың маңызы жөнінде әңгімеледі. Сондай-ақ халықтың әлеуметтік хал-ахуалын арттыру, азаматтардың өмір сүру сапасын жақсарту үшін қоғам өмірінде белсенді, жаңаша ойлы азаматтарды қолдау қажеттігі жөнінде сөз сөйледі.

«Өзіңізге мәлім ҚР Президенті Қ.Тоқаевтың саяси реформалар бағдарламасы аясында биыл еліміздің 830 ауылдық округінде әкімдердің тікелей сайлауы өтеді. Бұл сайлау саяси реформалардың негізгі өзегі дер едім. Өйткені саяси тарихта алғаш рет әкімдерді халық өздері сайлауда. Мәжілістегі «Нұр Отан» партиясы фракциясының депутаты ретінде өңірлерде партия атынан ұсынылып жатқан жас, ерік-жігері мол үміткерлерге қолдау көрсетуге келіп отырмын. Келешегі зор, елжанды, жаңашыл көзқарасты азаматтарға ағалық ақыл-кеңес айтып, бағыт-бағдар нұсқау өте маңызды», - деп атап өтті ол.

Сондай-ақ кездесу барысында Ақтау қалалық мәслихатының депутаты, ҚР Президенті жанындағы Ұлттық қоғамдық сенім кеңесінің мүшесі Уайс Ерсайынұлы терең білімді,ұшқыр ойлы, еңбекқор жас буын өкілдері ел болашағы екендігін ескеріп, Еркебұлан Жәнібек секілді ел ертеңіне алаңдаулы, туған өлкесінің өзекті мәселелеріне бей-жай қарамайтын азаматты қолдауға шақырды. Қоғамның сан саласында қызмет етіп жүрген жастар депутатқа сауалдар жолдап, түйіткілді мәселелер жөнінде өз пікірлерін ортаға салды. Ауыл халқын қолдау, жұмыспен қамту, ауыл-аймақты көгалдандыру, инженерлік инфрақұрылымдар сапасын жақсарту секілді маңызды мәселелер сөз болып, шешу жолдарын табуда бірге жұмыстану маңызы айтылды.

Бұдан бөлек, мәжіліс депутаты Е.Саиров Ақшұқыр ауылының тұрғыны, ардагер ұстаз, Қазақ ССР Халық ағарту ісінің озық қызметкері Әбдірахманов Оңайбай Рахиұлымен кездесіп, бірге канвассинг өткізді. Тұрғындар тарапынан келіп түскен сайлау жөніндегі сауалдар мен ұсыныстар кеңінен талқыланды.

Голрох Жеменей

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.