Экология министрлігі жағалаудан табылған өлі итбалыққа қатысты түсінік берді

Экология, геология және табиғи ресурстар министрлігінің балық шаруашылығы комитеті Каспий жағалауынан табылған өлі итбалыққа қатысты түсінік берді, - деп хабарлайды mangystaumedia.kz сайты ҚазАқпаратқа сілтеме жасап.

«Итбалық табылған жерге жедел түрде басқарма басшысы А. Шихметов бастаған Жайық-Каспий облысаралық бассейндік балық шаруашылығы инспекциясының Маңғыстау облысы бойынша балық шаруашылығы басқармасының мемлекеттік инспекторларынан құрылған топ жіберілді. Итбалықтың құйрығы түксіз, ыдырау күйінде болды. Алдын ала ақпарат бойынша, жануар бірнеше ай бұрын теңізде өлген, кейін теңіз дауылымен Ақтау қаласы маңындағы жағалауға шығып қалған», - деп түсіндірді ведомство.

Айтуынша, жануардың денесінде балық аулау құралдарының ізі, тұншығу, сондай-ақ зорлық-зомбылық белгілері жоқ.

«Сол себепті табиғатты қорғау полициясы мен ветеринарлық қызмет өкілдері оқиға орнына шақырылмады. Желіде тараған ақпаратта итбалықтың айналасы қан екені айтылады. Бірақ оның қан емес, күн сәулесі әсерінен жануардың денесінен ағып жатқан тері астындағы май екенін хабарлаймыз», - дейді Экология, геология және табиғи ресурстар министрлігі.

Еске сала кетейік, кеше Каспий теңізі жағалауынан табылған өлі итбалық туралы ақпарат Instagram желісінде тараған еді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.