Түркістан облысының тұрғындары мен еріктілері облыс әкімдігінің қолдауымен осы күнге дейін 33 вагон шөп жөнелткен. Оның жетеуін Құрмет Талапқазы бастаған еріктілер жіберген. Қалған шөп тиелген вагондарды тасымалдауға «Қазақстан темір жолы» ұлттық компаниясы» АҚ қолдау көрсетуде, - деп хабарлайды mangystaumedia.kz сайты Маңғыстау облысы әкімдігінің баспасөз қызметіне сілтеме жасап.
Келісімдерге сәйкес мал азығын жеткізу жұмыстары тегін жүргізіліп жатыр. Түркістан облысы әкімдігі және «Қазақстан темір жолы» ұлттық компаниясы» АҚ қажет болған жағдайда дайындалған жем-шөпті тасымалдау үшін 100 вагон ұсынуға дайын.
Түркістаннан шыққан 8 вагон мал азығы бүгін Жаңаөзен қаласы мен аудандарға жеткізіледі.
Ақтөбе облысының шаруа қожалықтары мен кәсіпкерлері де жүк көліктерімен шөп алып келе жатыр. Маңғыстау халқы «Қазақстан темір жолы» ұлттық компаниясы» АҚ, Түркістан облысының әкімдігі бастаған өңір жұртшылығы мен ерікті жастарға алғыс айтып отыр.
Алдағы уақытта Үкіметтен бөлінетін 1,9 млрд теңге маңғыстаулық шаруаларға үлестіріле бастайды. Сонымен қатар Маңғыстау облысы әкімінің бастамасымен өңірде шөп шабушыларға белгілі мөлшерде жанар-жағармаймен көмек беріледі.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
