Ақшұқыр мектеп-лицейі ұжымы толық вакцина алды

Ақшұқыр мектеп-лицейі мұғалімдерінің 98 пайызы вакцина алған, - деп хабарлайды mangystaumedia.kz сайты.

Бүгін Ақшұқыр мектеп-лицейіне барып, мұғалімдермен тілдесіп қайттық. Ұстаздар сәуір айынан бастап вакцина ала бастаған. Ал мектепте екпе алмаған соңғы бір мұғалім кеше вакцинаның бірінші компонентін салдырған. Мектеп-лицейдің директоры Қаламқас Қалиқызының айтуынша, коронавирусты тоқтатудың және дәстүрлі оқу форматына көшудің басты жолы – вакцина алу.

«Былтыр оқу жылында коронавирусқа байланысты оқушыларымыз дәстүрлі оқу форматына көше алмады. Онлайн режимде оқыған оқушылардың білім сапасы төмендеді. Онлайн оқыту ата-анаға, оқушыға, мұғалімдерге де өзіндік қиындық әкелді. Осының бәрі ұжымды ойландырды. Тіпті, былтыр оқу жылының жарты жылдығында онлайн әрі офлайн білім беріп те көрдік. Десе де оқушылардың білім сапасы әлсіреп кетті», - дейді мектеп-лицей директоры Қаламқас Тлеубаева.

Жақында Президент Үкіметтің кеңейтілген отырысында оқушылар мен студенттердің дәстүрлі оқу форматына оралуын қамтамасыз етуді тапсырған болатын. Бұл ретте Ақшұқыр мектеп-лицейі ұжымы вакцина алып, санитарлық талаптарды сақтап, толыққанды дайын отыр.

Мектепте 158 мұғалім, 42 кіші қызметкер жұмыс істейді. Бәрі де саналы түрде екпе алған.

«Мектепте тек жалпылама түсініктеме жұмыстары жүргізілді. Мұғалімдеріміз өз келісімдері арқылы саналы түрде екпе алды. Екпе алуға рұқсаты жоқ мұғалімдер де болды. 3 мұғалім денсаулығына байланысты ала алмаса, 12 мұғалім декреттік демалысқа шығуды жоспарлап отыр», - дейді мектеп-лицей директоры Қаламқас Қалиқызы.

Мектеп мұғалімдері не дейді?

«Дәрігерлердің айтуынша, коронавирустың алдын алатын жалғыз жол – вакцина. Дәрігерлердің осы сөзіне сенемін, сол себепті де екпе алуға шешім қабылдадым. Екпеден кейін ешқандай жанама әсерлер байқалмады. Қазір екпе туралы әлеуметтік желіде кереғар пікір өте көп. Мен оны дұрыс емес деп есептеймін. Бұл ретте әр адам ойын жинақтап, жауапкершілікті сезініп, саналы түрде вакцина алуды дұрыс деп таңдауы керек. Ашаршылық жылдарында шешек деген ауру болды. Қаншама адамды ажал алып кетті. Ол кезеңде ешқандай вакцина болмады ғой. Ал қазіргі жағдайда ауруға қарсы вакцина бар. Ғылым мен білім, технологиямыз дамып жатыр», - дейді тарих және құқық пәнінің мұғалімі Әлия Кадирова.

Ал қазақ тілі мен әдебиеті пәнінің мұғалімі Марат Қани вакцина алу арқылы ғана дәстүрлі оқу жүйесіне ораламыз дейді. Оның айтуынша, дәстүрлі оқу жүйесі оралса, оқушыларға сапалы білім беріледі. Сол арқылы ел болашағы үшін саналы ұрпақты қайта тәрбиелейміз.

«Сәуір айында ресейлік «СпутникV» вакцинасын алдым. Вакцинаның алғашқы компонентін алған кезде температура көтеріліп, әлсіздік пайда болды. Ал екінші компонентті алған уақытта ешқандай ауырсыну болмады. Қоғамда қарама-қарсы пікірдің болуы заңдылық. Бірі вакцинаны қолдаса, енді бірі сенімсіздік танытады. Ал біз білім ошағында жүргендіктен міндетті түрде вакцина алуымыз керек. Себебі былтыр оқушыларға қашықтан білім бердік. Алдағы уақытта да онлайн білім беру жалғасатын болса, білім сапасы төмендеп кетеді», - дейді мұғалім Марат Қани.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.