20 шілдеден бастап әр ай сайын облысқа 3 000 тонна шөп келеді. Бұл туралы облыстық ауыл шаруашылығы басқармасының басшысы Серік Қалдығұл «Nur Otan» партиясы Маңғыстау облыстық филиалы жанындағы аграрлық сектордың дамуы жөніндегі қоғамдық кеңесі отырысында айтты, - деп хабарлайды mangystaumedia.kz сайты.
Еске сала кетейік, 15 маусымнан бастап бүгінгі күнге дейін өңірге өзге облыстан 85 391 түк шөп, 5 750 түк жоңышқа және 1 564 рулон шөп келген болатын. Ал өңірде жыл басынан бері 402 тоннадай шөп шабылды. Қазіргі таңда бейнеулік кәсіпкер Кеңес Егізбаев Темір ауданына шабындыққа баруға дайындық жүргізіп жатыр. Маңғыстау ауданы кәсіпкері Сапар Орынбасаров болса Атырау облысы Қызылқоға ауданындағы «Жамансор» жерінен шөп шауып жатыр. Атап айтқанда, кәсіпкерлер Кендірлі-Каясан қорығының «Бопай» жерінен, Маңғыстау ауданының оңтүстік қыры «Бөрбас» жерінен шөп шабуда.
«Облысты нарықтық бағадан төмен жем-шөппен қамтамасыз ету үшін жергілікті бюджет есебінен тиісті қаражат бөлінді. Қыстыгүні облыс бойынша төрт түлікті азықпен толықтай қамтамасыз ету үшін 76 500 тонна шөп, 37 500 тонна жем қажет. Аудан әкімдіктерінің мәліметіне сәйкес, облыс бойынша қыс мезгіліне дайындалған мал азығы – 25 311 тонна. Оның ішінде шөптің көлемі – 8 955 тонна. Өзге облыстардан тасымалданып және өз өңірімізде дайындалған жемнің көлемі – 16 356 тонна», - дейді облыстық ауыл шаруашылығы басқармасының басшысы Серік Қалдығұл.
Айта кетейік, аталған қоғамдық кеңесі отырысына партия филиалы төрағасының бірінші орынбасары Е.Әбілов, партия филиалы төрағасының орынбасары З.Есбергенова, кеңес мүшелері, ауыл шаруашылығы басқармасының басшысы С.Қалдығұл, ветеринария басқармасының басшысы Ш.Хамиев, Қазақстан Республикасы Ауыл шаруашылығы министрлігі Ветеринариялық бақылау және қадағалау комитетінің Маңғыстау облыстық аумақтық инспекциясының басшысы – Т.Нуртазин және партиялық бақылау комиссиясының инспекторы – А.Хибасов қатысты.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
