Карантин: Ақтауда той жасаған мейрамхана анықталды

Ақтауда той жасаған мейрамханаға айыппұл салынады, деп хабарлайды mangystaumedia.kz.

Ақтауда мобильді топтар күшейтілген режимде жұмыс істеуде. Полиция қызметкерлері, әкімдік өкілдері дүкендерді, сауда орталықтарын, мейрамханаларды және басқа да кәсіпкерлік субъектілерін санитарлық-эпидемиологиялық талаптарды сақтау бойынша тексеруде.

Демалыс күндері болған рейд кезінде 1Б ш/а 8/2 ғимаратта орналасқан “Shalaho” тойханасында той болып жатқаны анықталды. Мониторинг тобы сағат 00:40 барып, тойға келгендерді тарқатты. Осы және өзге те тәртіп бұзушылықтар ресми түрде тіркеліп, мейрамхана басшылығына акт толтырылып, түсініктеме алынды, делінген Ақтау қаласы әкімдігінің баспасөз қызметі таратқан ақпаратта.

Әрі қарай тиісті шара қолдану үшін санитариялық-эпидемиологиялық қадағалау органдарына жолданды. Мониторинг тобының өкілдері вирус таралуына ықпал етіп, адамдар өмірін қауіпке тіккендер жауапкершілікке тартылатынын ескертеді.

Сонымен бірге, кәсіпкерлік субъектілерінің басшыларына санитарлық-эпидемиологиялық талаптарды бұзу бірнеше рет қайталанған жағдайда, ҚР қолданыстағы заңнамасы шеңберінде кәсіпкерлік субъектілерінің қызметін уақытша тоқтата тұру шарасы қолданылады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.