Мектеп оқушылары Қаракөл көлінің маңын қоқыстан тазартты

Ақтау қаласындағы химия-биология бағытындағы Назарбаев Зияткерлік мектебі мен Мұнайлы ауданы Қызылтөбе лицейі оқушыларынан құралған «Маңғыстау табиғаты» ҚБ «Қаракөл сақшылары» еріктілер экопатруль жасағы Қарақия-Қаракөл зоологиялық қаумалының бөлігі Қаракөл көлінің маңынан өзі аударғыш жүк машинасы көлемінде тұрмыстық және құрылыс қалдықтарын жинады, деп хабарлайды mangystaumedia.kz.

Жыл сайынғы «Парктер шеруі» халықаралық табиғатты қорғау акциясы аясында өткізілген халықаралық мәні бар сулы-батпақты алқабын санитарлық тазарту жұмыстарын Орта Азия Рамсар өңірлік бастамасы (ОА-РӨБ) үйлестіру комитетінің мүшесі Әділбек Қозыбақов «Ecojer» Қазақстандық қауымдастығының Маңғыстау облысы бойынша өңірлік экологиялық кеңесімен, «Табиғи орта» Батыс Қазақстан ҮЕҰ өңірлік ассоциациясымен және Үстірт мемлекеттік табиғи қорығымен бірлесіп, «МАЭК-Қазөнеркәсіп» ЖШС техникалық қолдауымен ұйымдастырған.

«Осы сулы-батпақты алқапта жылдың барлық мезгілдерінде суда жүзетін және су маңайы құстарының 175 дейін түрі мекендейді, олардың 20-дан астамы Қазақстанның Қызыл кітабына енгізілген. Олар сұңқылдақ аққу және кіші аққу, бұйра және қызғылт бірқазандары, сары, мысыр және кіші ақ құтандары, қоқиқаз, ақбас үйрек, қарабай, үкі, аққұйрықты субүркіт және т. б. Қаракөлдің Ақтау қаласына жақын орналасқандығы оқушылар мен студенттер үшін осында жыл бойы құстарды бақылап, мониторингтік түрлеріне санақ өткізіп тұруға мүмкіндік береді»,– деді Әділбек Қозыбақов.

ОА-РӨБ үйлестіру комитетінің мүшесі мәлімдегендей, қазіргі таңда табиғи ресурстар және табиғат пайдалануды реттеу, инвестициялар мен туризмді дамыту облыстық басқармаларының, «Ecojer» Қазақстандық қауымдастығы өңірлік экологиялық кеңесінің, «Атамекен» ҰКП Маңғыстау облысы кәсіпкерлер палатасының және басқа да мүдделі тараптарының қолдауымен «Қаракөл» экология және туризм орталығын құру жобасы жасалуда. Оның айтуынша, болашақ экологиялық-туристік орталық тек қана Қазақстанның теңіз астанасына турист тартумен шектелмей, сонымен қатар халықтың, әсіресе өскелен ұрпақтың, экологиялық мәдениетінің қалыптасуына өз ықпалын тигізетін болады.

Жыл сайынғы халықаралық акцияға оқушылардың үнемі қатысып тұруы туралы Ақтау қаласы ХББ НЗМ экология бойынша үйлестірушісі Бақытгүл Жақсылықова баяндап берді.

«Біздің мектебіміз ашылғалы, яғни алтыншы жыл қатарынан, Үстірт қорығымен және экологиялық ҮЕҰ-мен ынтымақтастық орнатқан. Мамандардың қолдауымен балалар әртүрлі тақырыптағы ғылыми жобалармен айналысады, оның ішінде биоалуантүрлілікті сақтау саласына ерекше мән беріледі. Әрине, оқушыларымыз Қаракөлде сенбілктерді де қызығушылықпен, туған өлкеміздің табиғатына пайда тигізетіндерін сезіне, өткізіп жүр. Жыл сайынғы «Парктер шеруі» акциясынан басқа, жыл сайын қаңтар айында өткізіліп жүрген Халықаралық суда жүзетін және су маңайы құстарының санағына да – International Waterbird Census (IWC) қатысамыз», – деді Бақытгүл Жақсылықова.

Жөнге салынған жұмыс нәтижелері бойынша акцияға қатысушылар өзі аударғыш жүк машинасы көлемінде, яғни 10 куб метр, тұрмыстық және құрылыс қалдықтарын жинады. Акция ұйымдастырушылары «МАЭК-Қазөнеркәсіп» ЖШС басшылығына техникалық қолдау үшін алғыстарын білдірді.

Нәтижелі өткен күн аяғында шаршаған, бірақ өздеріне өздері риза болған оқушыларға Қаракөлдің құстарын тамашалау үшін дүрбілер мен түтік дүрбілер қолданысқа берілді. Осылайша, «Қаракөл сақшылары» 107 қоқиқаз бен 30 астам үлкен суқұзғынның ұялап жатқан жұптарын көрді. Әділбек Қозыбақов жасөспірімдерге осында мекендейтін құстардың түрлері туралы қызықты деректерімен бөлісті.

Ақтау қаласы ХББ НЗМ оқушылары Карима Бөкенбаева мен Лейла Нұржайыққызы және Қызылтөбе лицейінің оқушысы Атабек Тұрғанбаев «Қаракөл сақшылары» еріктілер жасағының атынан Ақтау қаласының тұрғындары мен қонақтарын Қаракөл көлінде тазалықты сақтауға және туған табиғатымызды аялауға шақырды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.