Биыл 20 қызметкерге тәртіптік жаза қолданылды

Ақтау қаласы әкімдігіне қарасты «Абай атындағы мәдениет үйі», «Ақтау қалалық электр желілері» және «Ақтау тұрғын үй» мемлекеттік коммуналдық кәсіпорындарында комплаенс қызметтері құрылып, оған жауапты тұлғалар бекітілді. Бұл туралы «Antikor.live» жобасы аясында өткен тікелей эфирде қала әкімі Нұрдәулет Қилыбай мәлімдеді.

Сондай-ақ, тікелей эфир барысында Нұрдәулет Игілікұлы комплаенс қызметінің маңыздылығы туралы баяндай келе, қала әкімі аппаратында сыбайлас жемқорлыққа қарсы мәдениетті қалыптастыру және білім беру бағытында жүйелі іс-шаралар атқарылып жатқанына тоқталды.

Әкімдікте сыбайлас жемқорлық тәуекелдерін анықтау мақсатында бөлімдердің қызметін көрсететін нормативті-құқықтық актілеріне, персоналды басқару, кадрлардың ауысуы, мүдделер қақтығысы, ұйымдастырушылық-басқарушылық қызметтер сынды мәселелерге ішкі талдау жүргізіледі.

«Әкімдікте өткен жылы 37 мемлекеттік қызметшіге, биыл 20 қызметкерге ішкі талдаудың нәтижесінде ұйымдастырушылық-басқарушылық қызметтерін тиісті деңгейде орындамағаны үшін тәртіптік жаза қолданылды», деді Нұрдәулет Қилыбай.

Эфир барысында Нұрдәулет Қилыбай тұрғындар тарапынан келген сұрақтарға жауап берді.

«2025 жылға дейін қаладағы мектептерде үш ауысымды білім беруді болдырмау және бала туу көрсеткішіне сәйкес 14-16 мектеп салынуы керек. Ал қазіргі таңда Шығыс-1, 34 шағын аудандарда орналасқан екі мектептің құрылысы аяқталды, енді қолданысқа беріледі. Осы жылы тағы үш мектептің құрылысына келісімшарт жасалды», деді Нұрдәулет Игілікұлы.

Қала әкімі эфирде газ құю бекеттері мен тұрғын үйлердің өте жақын орналасуы, қаладағы үйлердің сыртқы көрінісіне қатысты сұрақтарға жауап беріп, мәселенің бақылауда екенін айтты.

Сонымен бірге, Нұрдәулет Қилыбай әкімдік қызметкерлерінің қандай да бір заң бұзушылықтар мен сыбайлас жемқорлық деректеріне жол бергені туралы ақпараттар белгілі болса, әлеуметтік желілер арқылы жеке парақшасына жазып, хабарлай алуға мүмкіндік бар екенін ескертті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.