Ұлыстың ұлы күні қарсаңында аудандық мәдениет үйінде «Қарақия аруы - 2021» аудандық байқауы өтті.
Өнер сайысына 16-20 жас аралығындағы сахна мәдениетін меңгерген, қазақтың салт-дәстүрін қадірлеп, құрметтейтін қазақтың қаракөз арулары қатысты. Қазақ қыздарының ой-өрісін, инабаттылығын, мәдениеттілігімен ізеттілігін таразыға салатын бұл байқау сұлулықты дәріптеу мен салт-дәстүрді насихаттауға бағытталған.
Сайысқа түскен үміткерлер қатарында Сенек ауылы, Қашан орта мектебінен Шұғыла Сәрсенғали, Аппақ елдімекені №11 орта мектебінен Айда Серікқалиқызы, Құрық орта мектеп гимназиясынан Айдана Нұрғали, Қарақия кәсіптік колледжінен Рысты Керімханқызы мен Жетібай ауылының №4 орта мектебінен Ақтілек Әмірханқызы болды. Сенек ауылы, Қашан орта мектебінің 10-сынып оқушысы Шұғыла Сәрсенғали мен Қарақия кәсіптік колледжінен қатысқан екінші курс студенті Рысты Керімханқызы сайысқа алғаш рет қатысып отырғанын айтады. Сайыс басында барлық қатысушы қыздардың қазақи нақышта өрнектелген, қазақ қызына тән қос етекті көйлектерімен білектей арқасына өрген бұрымдары өздеріне сондай жарасымды болды.
Сайыс барысында өз ұясында көргенімен қатар мектебіндегі ұстаздардан үйренген сан қырлы қасиетті құндылықтарды бір бойына жинаған қыздардың әдептілігі мен шынайылығы жиналғандарды таңқалдырып, сүйсіндірді десек қателеспейміз. Ұлттың ұйтқысы болып отырған осындай әдемі әрі ақылды аруларымыз тұрғанда қазақы қалпымыз бен ұлттық үрдісіміз сақталып, мәңгі жаңғыра бермек.
Өнегелі сайыстың бірінші шартында 5 ару өздерін өлең жолдарымен таныстырып өтті. Ал, сән үлгісін көрсету бөлімінде қыздар өз туындыларын паш етіп, өнерге бір табан жақын екендігін аңғартты. Ақыл мен зерде сыны бөлімінде салт-дәстүр төңірегіндегі сұрақтар өрбіді. Өз өнерін көрсету кезегінде көркем әдебиеттен образ сомдап, "Жетім" монологын оқылды.
Соңғы бөлім үй тапсырмасын орындау бойынша пысық арулар өздері дайындап әкелген қазақтың ұлттық тағамдары: қазы-қарта, шұбат, бауырсақ, құрт-ірімшік, дастархан мәзірінде сирек көрінетін әсіп, тәттілер, күріш тағамдарын көрсетіп,олардың дайындалу әдісіне тоқталды. Мерекелік кеште аудан өнерпаздары әсем әнмен көркем би билеп, сайыстың көркін аша түсті. "Жүзден жүйрік, мыңнан тұлпар" дегендей 5 арудың ортасынан озық өнерімен дараланған "Қарақия аруы - 2021" аудандық байқауының жеңімпазы атағына Сенек ауылы, Қашан орта мектебінің 10-сынып оқушысы Шұғыла Сәрсенғали ие болды.
Айта кетелік, жеңімпазға тәжді "Қарақия аруы - 2020" атанған Жауынбек Диана табыс етті. Сондай-ақ, Қарақия кәсіптік колледжінен қатысқан екінші курс студенті Рысты Керімханқызы бірінші орынға иеленсе, Құрық орта мектеп гимназиясынан Айдана Нұрғали екінші орынды ұтты. Ал, үшінші орын Аппақ елдімекені №11 орта мектебінен Айда Серікқалиқызына бұйырды. Қалған арулар ынталандыру сыйлығына ие болды. Жүлдегерлерге дипломдар мен ақшалай сыйлықтар тарту етілді.
Фариза Хайдарова
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
