Ақтаулық Амина коронавируспен ауырған атасына арнап ән орындады

Ақтаулық оқушы Амина Қолғанатова коронавируспен ауырған атасына арнап шығарған әнге клип түсірді. Ол әннің шығу тарихын жазып, өзінің инстапарақшасында бөлісті, - деп хабарлайды mangystaumedia.kz сайты.

Әннің аты - «Жаратқан Алла, індеттен сақта». Туындыға Сабыр Адай сөз жазса, Марат Оразбаев әнін шығарған.

«Бұл өзі жазда туған ән. Елге келген індет біздің отбасымызды да айналып өтпеді. Сүйікті атам қатты сырқаттанып төсекке танылды. Оның ауыр демалысы мен жөтелін естіген сайын біріміздің жүрегімізге мұң торлады. Қарғыс атқыр коронавирус атамның ұмыт болған ескі ауруын қайта қоздырды. Жазда әкем мен анамның көздеріне тұнған жасты жасырып, кеш бойы үреймен сыбырласа сөйлескенінің куәсі, күні бойы дәрі мен дәрігер іздеп сабылғанын көрдім. Өзім де атамның жүрегі ауыр соққанын және онысын білдіргісі келмейтінін түсіндім. Мен сияқты әлемдегі барлық балалардың коронавирус деген тажалмен бетпе-бет келуіне тура келді», - дейді жас орындаушы Амина Қолғанатова.

10 жасар Амина осы ән әр адамның жүрегінен орын алып, мейірім мен ізгіліктің гимніне айналғанын қалайды. Сонымен қатар барлық адамда болашаққа деген сенім орнаса екен деп тілейді.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.